Loksabha Election Results 2024 : निकालाचा पहिला कल हाती; महाराष्ट्रात भाजपची आगेकूच
- Published by:Shreyas
Last Updated:
लोकसभा निवडणुकीच्या मतमोजणीला सुरूवात झाली आहे. मतमोजणीच्या पहिल्या टप्प्यामध्ये पोस्टल बॅलटची मतं मोजली जात आहेत.
मुंबई : लोकसभा निवडणुकीच्या मतमोजणीला सुरूवात झाली आहे. मतमोजणीच्या पहिल्या टप्प्यामध्ये पोस्टल बॅलटची मतं मोजली जात आहेत. पोस्टल बॅलटमध्ये भाजप 4 जागांवर तर राष्ट्रवादी शरद पवार पक्ष एका जागेवर आघाडीवर आहे. याशिवाय शिंदेंची शिवसेना एका तर काँग्रेस एका जागेवर आघाडीवर आहे. बारामतीमध्ये सुप्रिया सुळे आघाडीवर आहेत, तर उत्तर मुंबईतून पियुष गोयल, अमरावतीत नवनीत राणा, संभाजीनगरमधून खैरे, चंद्रपूरमधून प्रतिभा धानोरकर आघाडीवर आहेत. दिंडोरीमधून भास्कर भगरे आघाडीवर आहेत. कल्याणमधून श्रीकांत शिंदे आघाडीवर आहेत.
जवळपास अडीच महिन्यांच्या राजकीय रणधुमाळीनंतर लोकसभेच्या महाभारताचा आज फैसला होणार आहे. देशातील 543 लोकसभा मतदारसंघात झालेल्या निवडणुकीचा निकाल आज स्पष्ट होणार आहे. विशेष म्हणजे, भाजपने यावेळी 'अब की बार 400 पार'चा नारा दिला आहे. पण एक्झिट पोलमध्ये एनडीएला 350 ते 380 पर्यंत जागांचा अंदाज वर्तवला आहे. त्यामुळे भाजप खरंच 400 पार करेल का हे पाहण्याचं ठरणार आहे. तर दुसरीकडे काँग्रेसने विरोधी पक्षांची मोट बांधत इंडिया आघाडीने लोकसभा निवडणूक लढवली आहे. त्यामुळे काँग्रेस यावेळी मोदींचा रथ रोखणार का, लोक इंडिया आघाडीला स्वीकारणार का हे पाहणं महत्त्वाचं ठरणार आहे.
advertisement
महाराष्ट्रात कोण उधळणार विजयाचा गुलाल?
निवडणूक लोकसभेची असली तरी राज्यातील जनतेचं लक्ष असणार आहे ते राज्यातील निकालांवर. राज्यात महायुती की मविआ कोण बाजी मारणार याकडे सर्वांचं लक्ष आहे. महायुतीनं आपण राज्यात 40 पेक्षा जास्त जागा जिंकणार असा दावा केलाय. तर मविआ नेतेही आपण 35 पेक्षा जास्त जागा जिंकू असा दावा करत आहेत. राज्यात अनेक मतदारसंघामध्ये चुरशीची लढत पाहायला मिळाली. बारामती, माढा, शिरूर, बीड, अमरावती, संभाजीनगर, ठाणे, कोल्हापूर, सांगली या मतदारसंघामध्ये कांटे की टक्कर झाली. अनेक मतदारसंघामध्ये जनतेचा कौल नेमका कुणाला याचा अंदाज छातीठोकपणे कुणालाही वर्तवता येत नाही. मराठवाड्यात जरांगे फॅक्टर या मतदानात दिसणार का याची चर्चा आहे. तर राज्यात वंचितचा फटका कुणाला बसणार याची उत्सुकताही आहे.
advertisement
एक्झिट पोलमध्ये महायुतीला सर्वाधिक जागा!
'न्यूज18 लोकमत'च्या मेगा एक्झिट पोलमध्ये महाराष्ट्राबाबत मोठा अंदाज वर्तवण्यात आला. सर्वात मोठा आणि विश्वसनीय 'मेगा एक्झिट पोल'नुसार महायुतीचं 45+ स्वप्न अधुरं राहिल्याचं पाहायला मिळतंय. एक्झिट पोलनुसार महाराष्ट्रात भाजप मोठा पक्ष असणार आहे. महाराष्ट्रात महायुतीला 32-35 जागांचा अंदाज असून मविआला 15-18 जागांचा अंदाज आहे. महाराष्ट्रात भाजपला 20-22 जागांचा अंदाज असून शिंदेंच्या शिवसेनेला 11-13 जागांचा अंदाज आहे. तर अजित पवारांच्या राष्ट्रवादीला एका जागेचा अंदाज आहे. तर उबाठा पक्षाला 3 ते 6 जागांचा अंदाज आहे. महाराष्ट्रात काँग्रेसला 6 ते 9 जागांचा अंदाज असून शरद पवारांच्या पक्षाला 4 ते 7 जागांचा अंदाज आहे.
advertisement
महाराष्ट्राचा मेगा एक्झिट पोल
एक्झिट पोलनुसार महायुती 45+स्वप्न अधुरं
राज्यात महायुतीला 32-35 जागांचा अंदाज
राज्यात मविआला 15-18 जागांचा अंदाज
राज्यात भाजपला 20-22 जागांचा अंदाज
Location :
Mumbai,Maharashtra
First Published :
June 04, 2024 8:08 AM IST
मराठी बातम्या/महाराष्ट्र/
Loksabha Election Results 2024 : निकालाचा पहिला कल हाती; महाराष्ट्रात भाजपची आगेकूच
