Madhukar Pichad: शरद पवारांचे निकटचे सहकारी,आदिवासींसाठी लढणारे नेते, कोण होते मधुकर पिचड?

महाविद्यालयीन जीवनात राष्ट्र सेवा दलाशी संपर्क आल्यानंतर ते काँग्रेसकडे आकृष्ट झाले. आदिवासी आणि शेतकऱ्यांच्या शोषणाविरुद्धच्या आंदोलनात त्यांनी सक्रीयपणे सहभाग नोंदवला. महाविद्यालयीन निवडणुकांच्या माध्यमातून ते राजकीय क्षेत्रात आले. सहकारी तत्त्वावर अकोले तालुक्यातील राजूर येथे त्यांनी पहिली दूध संस्था काढली. पहिल्या दिवशी २५ ते ३० लिटर दुधाचे संकलन झाले. पुढे हाच धंदा तालुक्याचा प्रमुख व्यवसाय बनला. आजच्या घडीला तालुक्यात २ लाख लीटर दूधाचे संकलन होते, याचे सर्वस्वी श्रेय पिचड यांच्या दूरदृष्टीला जाते.

शरद पवार काँग्रेसमधून बाहेर पडल्यानंतर त्यांच्या बरोबरच मधुकर पिचड देखील बाहेर पडले. राष्ट्रवादीच्या संस्थापक सदस्यांपैकी पिचड एक होते. याचीच जाणीव ठेवून शरद पवार यांनी पिचड यांना प्रदेशाध्यक्षपदी काम करण्याची संधी दिली. एका आदिवासी समाजाच्या नेत्याकडे प्रदेशाध्यक्षपद देऊन पवार यांनी सोशल इंजिनिअरिंग साधले. त्याचा फायदा त्यांना निवडणुकीच्या राजकारणातही झाला. पिचड यांनीही मिळालेल्या संधीचे सोने केले. राज्यातल्या जिल्ह्याजिल्ह्यात जाऊन त्यांनी पक्षसंघटन वाढवले. पक्षातील चांगल्या तरुणांना संधी दिली. निवडणुकीच्या राजकारणात आणले. यातूनच शरद पवार यांचे विश्वासू सहकारी अशी ओळख पिचड यांना मिळत गेली.