अजितदादांना समज द्या, भाजप आमदारांची थेट अमित शाहांकडे तक्रार, नांदेडमध्ये काय घडलं?

दुसरीकडे भाजपची शक्ती दिवसेंदिवस राज्यात वाढत असताना अजित पवार यांच्याकडून मात्र भाजपच्या नेते कार्यकर्त्यांच्या कामात अडथळा आणला जात असल्याची तक्रार भाजप आमदारांनी अमित शाह यांच्याकडे केल्याचे समजते. अजित पवार हे भाजप आमदार तसेच पदाधिकाऱ्यांच्या विरोधकांना ताकद देण्याचे काम करत असल्याची नाराजी भाजप आमदारांनी अमित शाह यांच्याकडे बोलून दाखवली. नांदेडच्या शंखनाद मेळाव्यानंतर आमदारांनी अमित शाह यांची भेट घेतल्याचे कळते आहे.

गत विधानसभा निवडणुकीत भाजप आमदारांकडून जे राष्ट्रवादीचे नेते पराभूत झाले आहेत, त्यांना ताकद देण्याचे काम अजित पवार यांच्याकडून होत आहे. त्यामुळे स्थानिक पातळीवर भाजपला मोठा संघर्ष करावा लागत असल्याचे आमदारांचे म्हणणे आहे. सत्तेत असतानाही तेथील राष्ट्रवादीचे नेते भाजप नेते-पदाधिकाऱ्यांवर कुरघोडी करत असल्याची तक्रार भाजप आमदारांनी अमित शाह यांच्याकडे केली.

आगामी स्थानिक स्वराज्य संस्थेच्या निवडणुकीत भाजपची कामगिरी उजवी व्हायची असेल तर अजित पवार यांना भाजप नेतृत्वाने समज द्यावी, जेणेकरून ते भाजप पदाधिकाऱ्यांच्या रस्त्यात आडकाठी आणणार नाही, अशा स्पष्ट शब्दात आमदारांनी अजित पवार यांच्याविरोधात तक्रार केली.

अमित शाह यांच्या नियोजित दौऱ्यामध्ये ऐनवेळी बदल झाला असून ते मंगळवारी दिल्लीकडे रवाना होणार आहेत. त्याआधी अमित शाह आणि उपमुख्यमंत्री अजित पवार यांची सोमवारी रात्री मुंबईतील सह्याद्री अतिथीगृहावर भेट झाली. उभय नेत्यांमध्ये २० मिनिटे चर्चा झाली. या चर्चेतील तपशील अजून कळू शकलेला नाही.