Maharashtra New CM Live Updates : महायुतीच्या नेत्यांचा राज्यापालांकडे सत्ता स्थापनेचा दावा, आता उद्या शपथविधी पार पडणार

भाजपच्या विधिमंडळ गटनेत्याची निवड करण्यासाठी गुजरातचे माजी मुख्यमंत्री विजय रूपाणी मुंबईत दाखल झाले आहेत. तर केंद्रीय अर्थमंत्री निर्मला सीतारमण यासुद्धा रात्री उशीरा मुंबईत पोहोचल्या. आज सकाळी विधान भवनाच्या सेंट्रल हॉलमध्ये आमदारांची बैठक होणार आहे. भाजपचा गटनेता निवडल्यानंतर महायुतीची बैठक होईल. यात नेत्याची निवड केली जाईल. यानंतर महायुतीचे नेते राजभवनात जाऊन राज्यपालांसमोर सरकार स्थापनेचा दावा करतील.  वाचा, सगळ्या राजकीय घडामोडी एका क्लिकवर...

देवेंद्र फडणवीस,अजित पवार आणि एकनाथ शिंदे राजभवनावर दाखल झाले आहेत. आता महायुतीचे नेते राज्यपाल सी पी राधाकृष्णन यांची भेट घेऊन सत्ता स्थापनेचा दावा करणार आहेत.

देवेंद्र फडणवीस आणि अजित पवार वर्षा बंगल्यावर दाखल झाले आहेत.  वर्षा बंगल्यावर महायुतीच्या नेत्यांची बैठक पार पडणार आहे. या बैठकीसाठी हे दोन्ही नेते दाखल झाले आहेत. या बैठकीत खातेवाटपावर चर्चा होण्याची शक्यता आहे.

देवेंद्र फडणवीस यांची गटनेते पदी निवड झाल्यानंतर त्यांच्या धरमपेठ निवासस्थानाच्या बाहेर फटाक्यांची आतिषबाजी करण्यात आली आहे.त्याचसोबत ढोल ताशावर कार्यकर्त्यांनी जल्लोष देखील केला आहे.

माजी मुख्यमंत्री विजय रूपानी सुरूवातीला गटनेता पदासाठी आणखी कुणाचा प्रस्ताव आहे का? अशी विचारणा आमदारांना केली.त्यानंतर आमदारांनी नाही म्हटल्यावर रूपानी यांनी देवेंद्र फडणवीस यांची गटनेतेपदी निवड केल्याची घोषणा केली आहे.

चंद्रकांत पाटील आणि सुधीर मुनगंटीवार यांनी देवेंद्र फडणवीसांच्या नावाचा प्रस्ताव मांडला.

सर्वांसाठी आनंदाचा दिवस आहे. आज आपल्या विधीमंडळ गटनेत्याची निवड आहे. या निवडीकरता गुजरात प्रदेशचे माजी मुख्यमंत्री आणि पंजाबचे प्रभारी विजय रुपाणी निरीक्षक म्हणून आले आहेत.बैठकीत सहनिरीक्षक म्हणून केंद्रीय अर्थमंत्री निर्मला सीतारमण या आल्या आहेत.

हा ऐतिहासिक दिवस आहे. माफ करा, मी देवेंद्र फडणवीस यांचा उल्लेख करायचं राहुन गेलं. ते खाली बसले असल्यानं नाव राहिलं,असे चंद्रशेखर बावनकुळे यांनी सांगितले.

देवेंद्र फडणवीस सर्वांपेक्षा वेगळा फेटा बांधून सभागृहात दाखल झाले आहेत. त्याच्यासोबत केंद्रीय पर्यवेक्षक निर्मला सितारामण, विजय रूपाणी आणि भाजपचे सरचिटणीस विनोद तावडे सभागृहात दाखल झाले आहेत.

भाजपच्या विधीमंडळ पक्षाच्या बैठकीला सुरुवात झाली आहे. देवेंद्र फडणवीसांच्या नावाचा प्रस्ताव चंद्रकांत पाटील आणि सुधीर मुनगंटीवार मांडणार आहेत. त्याला आशिष शेलार, रवींद्र चव्हाण अनुमोदन देणार आहेत.

भाजपच्या नवनिर्वाचित आमदारांची बैठक थोड्या वेळेत सुरू होणार आहे. गटनेता पदासंदर्भात चंद्रकांत पाटील आणि सुधीर मुनगंटीवार प्रस्ताव मांडणार आहेत.

भाजपाच्या कोअर कमिटी बैठकीला सुरूवात झाली आहे.या बैठकीत गटनेता निवडी संदर्भात प्रस्ताव मांडला जाईल आणि त्यानंतर थेट विधीमंडळ सेन्ट्रल हॉल मध्ये सर्व आमदारांसमोर कोअर कमिटी बैठकीत संमत झालेला प्रस्ताव मांडला जाईल.सर्व आमदारांच्या अनुमोदन मिळाल्या नंतर भाजपा गटनेता निवडला जाईल.

भाजपच्या नवनिर्वाचित आमदारांच्या बैठकीपूर्वी भाजपच्या कोअर समितीची बैठक सुरू.