Nashik News : नाशिकमध्ये शाळकरी विद्यार्थिनीचा हृदयविकाराने मृत्यू, सहावीत शिकणारी श्रेया गेटमधून आत आली अन्...

डॉक्टरांनी श्रेयाला मृत घोषित केल्यानंतर शिक्षकांना देखील धक्का बसला आहे. डॉक्टरांनी दिलेल्या माहितीनुसार, श्रेयाला हृदयाशी संबंधित आजार होता. यामुळेच तिला हा तीव्र हृदयविकाराचा झटका आला असावा, असा अंदाज व्यक्त करण्यात येत आहे. या घटनेमुळे श्रेयाच्या कुटुंबावर आणि शाळेवर शोककळा पसरली आहे.

या घटनेनंतर नाशकातील शहरातील इतर शाळांमध्येही या घटनेमुळे चिंतेचे वातावरण निर्माण झाले आहे. शाळेत देखील वैद्यकीय तपासणी वेळोवेळी केली जावी, अशी मागणी आता पालकांकडून करण्यात येत आहे.

दरम्यान, सध्याच्या बदललेल्या जीवनशैलीमुळे आणि आहारामुळे लहान मुलांमध्येही हृदयविकाराचा झटका येण्याचे प्रमाण वाढताना दिसत आहे, ही एक गंभीर आणि चिंतेची बाब आहे. पूर्वी हा आजार केवळ वृद्धांमध्ये दिसून येत होता, पण आता त्याचे वय कमी झाले आहे. काही मुले हृदयातील रचनात्मक दोषांसह जन्माला येतात, ज्यामुळे हृदयाच्या कार्यक्षमतेवर परिणाम होतो. हे दोष रक्ताभिसरण सामान्य होण्यापासून रोखतात आणि लहान वयातच हृदयविकाराचा धोका वाढवतात. चुकीच्या खाण्याच्या सवयी, जंक फूडचे अति सेवन आणि मैदानी खेळांचा अभाव यामुळे लहान मुलांमध्ये लठ्ठपणा वाढत आहे. यामुळे उच्च रक्तदाब आणि मधुमेह यांसारख्या समस्या निर्माण होतात, ज्यामुळे हृदयावर ताण येतो.