अतिवृष्टी झाली, आता सगळं संपलंय.. ५ हजार शेतकऱ्यांचे फोन, तुम्हीही कराल 'शिवार'ला सॅल्यूट...!

शेतकऱ्यांच्या आत्महत्यांना आळा घालण्यासाठी आणि त्यांना मानसिक आधार देण्यासाठी शिवार फाऊंडेशनकडून सुरू करण्यात आलेली ‘शिवार हेल्पलाईन’ शेतकऱ्यांसाठी आशेचा किरण ठरत आहे. या हेल्पलाईनवर केवळ दोन आठवड्यांच्या कालावधीत म्हणजे २४ सप्टेंबर ते ८ ऑक्टोबरदरम्यान — राज्यभरातील तब्बल ५,४४६ शेतकऱ्यांनी संपर्क साधला.

या काळात एकूण २६ जिल्ह्यांमधून फोन आले, ज्यात नांदेड जिल्हा सर्वाधिक ७८९ फोनसह पहिल्या क्रमांकावर राहिला. त्यानंतर उस्मानाबाद (धाराशीव) येथून ६९३, सोलापूरहून ६७५, आणि बीड जिल्ह्यातून ४९३ फोन आले. औरंगाबाद (छत्रपती संभाजीनगर) येथून ३४८ कॉल्स प्राप्त झाले. लातूर, अहमदनगर, परभणी, नागपूर, अकोला, अमरावती, बुलढाणा, यवतमाळ, वर्धा, हिंगोली, वाशिम, जळगाव, जालना, नाशिक, पुणे, सांगली, सातारा, अहिल्यनगर आणि भंडारा यांसारख्या जिल्ह्यांमधूनही शेतकऱ्यांनी या हेल्पलाईनवर संपर्क साधला.

सर्वाधिक फोन मराठवाडा आणि विदर्भातील जिल्ह्यांमधून आल्याचे दिसून आले. या भागांतील शेतकरी आर्थिक संकट, दुष्काळ, पिकांचे नुकसान आणि कर्जबाजारीपणामुळे मानसिक तणावात आहेत. या पार्श्वभूमीवर शिवार हेल्पलाईन” शेतकऱ्यांसाठी मानसिक आधार आणि समुपदेशनाचं माध्यम ठरत आहे.