घरातील AC ने घेतला जीव, सोलापूरात विवाहित महिलेचा दुर्दैवी अंत, क्षणात होत्याचं नव्हतं झालं

पल्लवी प्रवीण सग्गम असे मृत महिलेचे नाव असून ही घटना गुरुवारी घडली. ज्यावेळी ही दुर्घटना घडली त्यावेळी मयत पल्लवी सग्गम घरात बसल्या होत्या. यावेळी अचानक त्यांच्या घरातील एसीचा स्फोट झाला. स्फोटानंतर काही काही कळायच्या आत घरात तत्काळ शॉर्टसर्किट झाले आणि आग वेगाने पसरली. आगीच्या ज्वाळा इतक्या भयंकर होत्या की, त्यांना घरातून बाहेर पडण्याची संधीच मिळाली नाही. आजूबाजूच्या रहिवाशांनी आग लागल्याचे पाहिल्यानंतर आरडाओरडा सुरू केला आणि तत्काळ अग्निशमन दलाला आणि पोलिसांना याची माहिती दिली.

अग्निशमन दलाचे जवान घटनास्थळी दाखल झाले आणि त्यांनी आग विझवण्यासाठी शर्थीचे प्रयत्न केले. अथक प्रयत्नांनंतर आगीवर नियंत्रण मिळवण्यात यश आले, परंतु तोपर्यंत खूप उशीर झाला होता. घरात तपासणी केली असता, पल्लवी सग्गम यांचा मृतदेह पूर्णपणे होरपळलेल्या अवस्थेत आढळून आला.