Amitabh Bachchan: हॉटेल रुम अन् महिला चाहतीने साडीच फेडली; अमिताभ बच्चनसोबत घडलेला घाबरवणारा प्रसंग

बॉलिवूडचा शहंशाह अमिताभ बच्चन यांच्या आयुष्यात अनेक किस्से आहेत. लाखो चाहते त्यांना देवासारखं पूजतात, पण चाहत्यांचं हे अतीव प्रेम कधी-कधी त्यांच्यासाठी संकट ठरतं.

1975 साली घडलेला एक प्रसंग तर इतका धक्कादायक होता की अमिताभ स्वतः काही क्षणांसाठी स्तब्ध झाले होते. अमिताभ यांच्या एका महिला चाहतीने त्यांच्यासमोर साडीच फेडली होती.

त्या काळात अमिताभ बच्चन एका चित्रपटाच्या शूटिंगसाठी बाहेरगावी गेले होते. दिवसभराचं काम आटोपून ते हॉटेलमध्ये परतले. पण खोलीत प्रवेश करताच त्यांना धक्का बसला. खोलीत एक तरुणी बराच वेळ त्यांची वाट पाहत बसली होती. प्रथम त्यांनी तिला बाहेर जाण्यास सांगितलं, पण ती हललीही नाही. उलट ती सतत एकच वाक्य म्हणत राहिली, "मी तुमच्यावर खूप प्रेम करते."

अमिताभ बच्चन यांनी तिच्या प्रस्तावाला नकार दिला. पण त्या मुलीने पुढच्याच क्षणी एक धक्कादायक पाऊल उचललं. तिने थेट साडी काढायला सुरुवात केली आणि धमकी दिली की जर तिचं प्रेम मान्य केलं नाही, तर ती गोंधळ घालून बिग बींवर गंभीर आरोप करेल. ही परिस्थिती कोणत्याही अभिनेत्याला हादरवणारी होती.

अमिताभ बच्चन थोडे घाबरले, पण त्यांनी स्वतःवर नियंत्रण ठेवलं. त्यांना वाटलं, ही तरुणी कदाचित मानसिक तणावाखाली आहे. त्यांनी रागावण्याऐवजी समजूतदारपणे संवाद साधण्याचा मार्ग निवडला. ते शांतपणे म्हणाले, "चला, आधी चहा घेऊया."

काही वेळाने वेटर चहा घेऊन खोलीत आला. अमिताभ यांनी त्या संधीचा उपयोग केला. त्यांनी प्रेमाने, कोणताही गोंधळ न करता, त्या तरुणीला खोलीबाहेर नेलं आणि हॉटेलच्या सुरक्षारक्षकांकडे तिला सुपूर्द केलं. मोठं संकट टळलं.

1975 हे वर्ष अमिताभ बच्चन यांच्या कारकिर्दीचं टर्निंग पॉईंट होतं. ‘दीवार’ आणि ‘शोले’ सारख्या चित्रपटांनी त्यांना सुपरस्टार बनवलं होतं. देशभरातील प्रेक्षक, विशेषतः तरुणी, त्यांच्या अभिनयावर आणि व्यक्तिमत्त्वावर अक्षरशः वेड्या झाल्या होत्या. पण याच चाहत्यांच्या अति उत्साहामुळे त्यांना असे विचित्र आणि धोकादायक प्रसंगही अनुभवावे लागले.