Thane Ganesh Visarjan: दीड दिवसांच्या बाप्पाचं होणार विसर्जन, ठाणेकरांसाठी महापालिकेची विशेष सोय

ठाणे: सर्वांच्या लाडक्या गणरायाचं घरोघरी आगमन झालं आहे. 27 ऑगस्ट रोजी गणेश चतुर्थीच्या दिवशी अनेकांनी आपल्या घरी गणपती बाप्पाची प्राणप्रतिष्ठा केली. काहीजण दीड दिवसांचा, काही जण पाच दिवसांचा तर काही जण 10 दिवसांचा गणपती बसवतात. आज दीड दिवसाच्या गणपतीचं विसर्जन होणार आहे. त्यामुळे ठाणे शहरात विविध ठिकाणी बाप्पांच्या विसर्जनाची व्यवस्था करण्यात आली आहे. यंदा ठाणे महानगरपालिकेने मूर्ती विसर्जनाच्या व्यवस्थेत दीडपट वाढ केली आहे. शहरातील तलावांचं आणि इतर जलाशयांचं प्रदूषण टाळण्यासाठी कृत्रिम तलावांवर विशेष भर देण्यात आला आहे.