रानावनात उगवणाऱ्या भाजीची शेतकऱ्याने केली शेती, लोकांनी मारले टोमणे, पण आता बक्कळ कमाई

दीपक डोके हे जालना जिल्ह्यातील बोरगाव या छोट्याशा खेडेगावातील अल्पभूधारक शेतकरी शेती करून ते विवाह सोहळ्यासाठी आवश्यक असणाऱ्या मंडप डेकोरेशनचे देखील काम करतात. संभाजीनगर येथील एका शेतकऱ्याने करटुले रान भाजीची शेती यशस्वी केल्याची माहिती त्यांना मिळाली. ही शेती आपण देखील करू शकतो असा आत्मविश्वास आल्यानंतर त्यांनी संभाजीनगर येथून एका दुकानातून 10 हजार रुपये प्रति किलो या दराने करटुले बियाण्याची खरेदी केली. 1 मे रोजी पाच फूट अंतरावर बेड पाडून एका फुटावर करटुल्याची लागवड केली. यासाठी ठिबक मल्चिंग तसेच बांबू लावून वेलवर जाण्यासाठी तारांची व्यवस्था केली. यासाठी त्यांना एकूण 25 हजारांचा खर्च आला.

करटुले शेती नवीन असल्याने गावातील अनेकांनी त्यांना तुम्ही आता फॉरेन शेतकरी झालात असे टोमणे देखील मारले. या नवीन पिकाबद्दल त्यांना काहीच माहिती नसल्याने कृषी सेवा केंद्र चालकांकडून त्यांनी मार्गदर्शन घेतले. वेगवेगळी औषधे आणि खते देऊन करटुले पिकाला जीवापाड जीव लावला. मागील महिनाभरापासून त्यांच्या शेतामधून करटुले पिकाचे उत्पन्न सुरू झालं असून सुरुवातीला 12 ते 15 हजार रुपये दर आठवड्याला यातून उत्पन्न मिळायचं. आता करटुलीचे दर काहीशी कमी झाल्याने त्यांना यातून 10 ते 12 हजार रुपये दर आठवड्याला मिळतात.

सुरुवातीला मला 210 रुपयांपर्यंत दर मिळाला आता जालना मार्केटमध्ये 130 रुपयांपर्यंत दर मिळत आहे. एका आठवड्यात दोन तोडे होतात एका तोड्याची पाच ते साडेपाच हजार रुपये मिळतात. आतापर्यंत 80 हजार रुपयांचे उत्पन्न झाले आहे तर एकूण दीड ते दोन लाखांचे उत्पन्न होईल अशी अपेक्षा मला आहे. कुणी कितीही नाव ठेवली तरी शेतकऱ्यांनी शेतामध्ये वेगवेगळे प्रयोग केलेच पाहिजेत असं दीपक डोके यांनी सांगितलं.