Mumbai Local Accident: लाईफलाइन ठरली डेथलाईन! कोणत्या कारणांनी रेल्वे रुळावर पडले प्रवासी? समोर आली धक्कादायक माहिती...

आज सकाळी 10 ते 12 प्रवासी ट्रेनमधून पडल्याची माहिती समोर आल्यानंतर एकच खळबळ उडाली. त्यानंतर आता दिवा स्थानकातही दोन प्रवासी पडले असल्याची माहिती समोर आली आहे. हे दोन्ही प्रवासी महिला असल्याची माहिती सूत्रांनी दिली. या महिला जखमी असून त्यांच्यावर उपचार सुरू आहेत.

समोर आलेल्या माहितीनुसार, टिटवाळ्याहून छत्रपती शिवाजी महाराज टर्मिनसकडे जाणाऱ्या लोकलमधील प्रवासी पडले असल्याची माहिती समोर आली आहे. आज सोमवारचा दिवस आणि कामावर जाण्याची घाई यामुळे लोकलमध्ये प्रचंड गर्दी असते. या गर्दीमुळेच प्रवाशांचा घात झाला असल्याची माहिती समोर आली आहे. मात्र, हे प्रवासी पुष्पक एक्स्प्रेसमधील असल्याचे काहींनी म्हटले होते. मात्र, रेल्वे अधिकाऱ्यांनी दिलेल्या माहितीनुसार, टिटवाळाहून सीएसएमटीकडे जाणाऱ्या ट्रेनमधून प्रवासी ट्रॅकवर पडले. प्रवाशांनी खच्चाखच भरलेल्या ट्रेनमध्ये प्रचंड गर्दी होती. 6 प्रवाशांचा मृत्यू झाल्याची माहिती समोर आली आहे.

रेल्वे पोलिसांनी दिलेल्या माहितीनुसार, आज सकाळी 9 वाजण्याच्या सुमारास हा अपघात झाला. पुष्पक एक्स्प्रेस आणि लोकल एकाच वेळी विरुद्ध दिशेने बाजूने वेगाने गेले. त्यावेळी दरवाजामध्ये असलेल्या प्रवाशांना तोल सांभाळता आला नाही. त्यामुळे प्रवाशी रेल्वे रुळावर पडले आणि अपघात झाला असल्याची माहिती रेल्वे पोलिसांनी दिली.  रेल्वे अधिकाऱ्यांनी दिलेल्या माहितीनुसार, हा अपघात झाल्यानंतर कसारा लोकलच्या गार्डने या अपघाताची माहिती रेल्वे प्रशासनाला दिली.

एका प्रत्यक्षदर्शीने न्यूज 18 लोकमतला दिलेल्या माहितीनुसार सीएसएमटीच्या दिशेने जाणाऱ्या ट्रेनमधून प्रवासी पडले.  त्यातील 8 जणांना रुग्णालयात दाखल करण्यात आले असल्याची माहिती रेल्वे पोलिसांनी दिली.