मुंबईत पर्युषण काळात दोन दिवस कत्तलखाने बंद, जैन समाजाची मागणी पालिकेकडून मान्य

मुंबई :  स्वातंत्र्य दिनानिमित्त राज्यातील काही महानगरपालिकांनी मांसविक्रीवर बंदी घालण्यात आल्याच्या मुद्द्यावरुन राज्यातील राजकारण तापलेलं असतानाच आता पुन्हा दोन दिवस कत्तलखाने बंद ठेवण्यात येणार आहे. जैन समाजासाठी पवित्र मानल्या जाणाऱ्या पर्युषण काळात दोन दिवस कत्तलखाने बंद ठेवण्याचा निर्णय महापालिका आयु्क्तांनी घेतला असून या संदर्भात मुंबई उच्च न्यायालयात दिली आहे. मंगळवारपासून पर्युषण पर्वास सुरूवात झाली आहे.

जैन समाजासाठी पर्युषणकाळ पवित्र मानला जातो.  या काळात  मुंबईत दोन दिवस कत्तलखाने बंद ठेवण्यात येणार आहे. मुख्य न्यायमूर्ती आलोक आराधे आणि न्यायमूर्ती संदीप मारणे यांच्या द्विसदस्य खंडपीठापुढे सुनावणी झाली . शेठ मोतीशॉ लालबाग जैन चॅरिटीज आणि शेठ भेरूलालजी कन्हैयालालजी कोठारी धार्मिक ट्रस्टनं दाखल केलेल्या याचिकेवर आज सुनावणी झाली. पर्युषण काळात नऊ दिवसांऐवजी एकच दिवस कत्तलखाने बंद ठेवण्याच्या महानगरपालिका आयुक्तांच्या 30 ऑगस्ट 2024च्या निर्णयाला याचिकाकर्त्यांनी दिले आव्हान होते. त्यानंतर आता सुधारित आदेशात दोन दिवस बंद ठेवण्याचा निर्णय घेतला आहे.