Mumbai News : लाखो रुपयांची कमाई करणारा मुंबईतील 'तो' अजब रस्ता! वाहनांनाही प्रवेश नाही, तरीही पालिका होतेय श्रीमंत

मुंबई महापालिकेने सात महिन्यांपूर्वी मलबार हिल परिसरात ‘निसर्ग उन्नत मार्ग’अर्थात एलिव्हेटेड नेचर ट्रेलचे लोकार्पण केले होते. साधारण सात महिन्यांत हे ठिकाण मुंबईकरांच्या आणि पर्यटकांच्या पसंतीस उतरले आहे. राणीच्या बागेनंतर हे ठिकाण आता शहरातील एक नवे आकर्षण ठरत असून दिवाळीच्या सुट्यांमध्ये येथे मोठ्या प्रमाणावर गर्दी होत आहे. आतापर्यंत तब्बल दोन लाख 98 हजारांहून अधिक पर्यटकांनी या मार्गाला भेट दिली आहे.

हे ठिकाण दररोज पहाटे 5 ते रात्री 9 वाजेपर्यंत सर्वांसाठी खुल असतं. भारतीय नागरिकांसाठी प्रवेश शुल्क 25 रुपये असून तर परदेशी पर्यटकांसाठी 100 रुपये आहे. मुंबईतील स्थानिकांसह देश-विदेशातून येणारे अनेक पर्यटक येथे भेट देत आहेत. हिरवाईने नटलेल्या झाडांमधून चालताना समुद्राचे विहंगम दृश्य पाहण्याचा अनोखा अनुभव पर्यटकांना मिळतो.

‘निसर्ग उन्नत मार्गा’वरून चालताना मुंबईची समृद्ध जैवविविधता अनुभवता येते. येथे 200 हून अधिक वनस्पती प्रजाती, विविध प्रकारचे पक्षी आणि सरपटणारे प्राणी पाहायला मिळतात. एका ठिकाणावरून गिरगाव चौपटीचे मनमोहक दृश्यही पाहता येते. त्यामुळे निसर्गप्रेमी आणि छायाचित्रकारांसाठी हे ठिकाण खास ठरत आहे.