न्या. त्रिवेदी यांचा निरोप समारंभच झाला नाही, बार असोसिएशनची ताठर भूमिका, सरन्यायाधीशांनी झापलं

परंपरेला धरून न्यायमुर्ती बेला त्रिवेदी यांचा निरोप समारंभाचा कार्यक्रम व्हायलाच हवा होता पण बार संघटनांनी तो केला नाही. या गोष्टीचा अगदी उघडपणे विरोध करायलाच हवा. बार असोसिएशने अशी भूमिका घ्यायला नको होती, अशा शब्दात सरन्यायाधीश भूषण गवई नाराजी व्यक्त करून बार असोसिएशनला परखड शब्दात सुनावले.

बार असोसिएशनने विरोधी भूमिका घेतलेली असली तरी कपील सिब्बल श्रीवास्तव या दोघांनीही त्याकडे दुर्लक्ष करून उपस्थिती दर्शवली, याबद्दल मी त्यांचे आभार मानतो. मंडळाने मंजूर केलेल्या ठरावाला न जुमानता ते आले. बेला त्रिवेदी या चांगल्या न्यायाधीश होत्या, यावर त्यांच्या उपस्थितीने शिक्कामोर्तब होते.

सर्वोच्च न्यायालयात बनावट वकिलपत्राचा वापर करून बनावट याचिका दाखल केल्याच्या कथित प्रकरणात काही वकिलांच्या विरोधात न्यायमु्र्ती बेला त्रिवेदी यांनी सीबीआय चौकशीचे आदेश दिले होते. बार अधिकाऱ्यांनी न्या. त्रिवेदी यांना विनंती करीत होते. परंतु मागेपुढे न पाहता आपल्या भूमिकेवर बेला त्रिवेदी ठाम राहिल्या. तसेच कथित गैरवर्तन केल्याबद्दल काही वकिलांवर कठोर कारवाई करण्याचे आदेशही न्या. त्रिवेदी यांनी दिले होते. त्यानंतरचा माफीनामा स्वीकारण्यास देखील त्रिवेदी यांनी नकार दिला होता. न्या. त्रिवेदी यांचा कडक आणि ताठर स्वभाव लक्षात घेताच बार असोसिएशनमधील एका गटाने निरोप समारंभ आयोजित न करण्याची भूमिका घेतल्याचे कळते.