कोयना 86 टीएमसी भरले, नदीपात्रात पाण्याचा जोरदार विसर्ग सुरू, नदीकाठच्या गावांना सावधानतेचा इशारा!

धरणातून सोडण्यात येत असलेले पाणी आणि पूर्वेकडील विभागात पडणाऱ्या पावसामुळे कोयना नदीच्या पाणी पातळीत लक्षणीय वाढ झाली आहे. यामुळे नदीकाठी वसलेल्या गावांना आणि लोकवस्त्यांना प्रशासनाकडून सावधानतेचा इशारा कायम ठेवण्यात आला आहे, जेणेकरून कोणत्याही संभाव्य धोक्यापासून बचाव करता येईल.

कोयना धरण शिवसागर जलाशयाच्या परिसरात, म्हणजेच कोयना, नवजा आणि महाबळेश्वर या तिन्ही विभागात सध्या कमी प्रमाणात पाऊस पडत आहे. तरीही, या पावसामुळे धरणांतर्गत असलेल्या छोट्या नद्या, नाले, ओढे आणि धबधब्यांतून मोठ्या प्रमाणावर पाण्याची आवक होत आहे. सध्या धरणाच्या दरवाजातून चार फुटांनी प्रतिसेकंद 19724 क्युसेक आणि पायथा वीज गृहातील वीस मेगावॅट क्षमतेच्या दोन जनित्रांद्वारे चाळीस मेगावॅट वीजनिर्मिती करून 2100 क्यूसेक नदीत सोडले जात आहे.

मंगळवारी संध्याकाळी पाच ते बुधवारी संध्याकाळी 5 वाजेपर्यंत धरणाच्या पाणीसाठी 2.16 टीएमसीने वाढ झालेली आहे. या धरणात सध्या उपयुक्त पाणीसाठी 81.04 टीएमसी आहे. 105.25 टीएमसी क्षमता असलेल्या धरणात अजून 19.21 टीएमसी पाण्याची गरज आहे, तेव्हा धरण पूर्ण क्षमतेने भरले जाईल.