बॉक्स ऑफिसवर लावली आग, पण Netflix वर येताच 'धुरंधर'चा खेळ खंडोबा! OTT रिलीजच्या पहिल्याच दिवशी ट्रोल

मुंबई : बॉक्स ऑफिसवर १३०० कोटींहून अधिक गल्ला जमवून अख्ख्या देशाला वेड लावणारा रणवीर सिंगचा 'धुरंधर' चित्रपट 30 जानेवारीच्या मध्यरात्री १२ वाजता नेटफ्लिक्सवर प्रदर्शित झाला. थिएटरमध्ये धुमाकूळ घातल्यानंतर प्रेक्षकांना अपेक्षा होती की, घरबसल्या ओटीटीवर या चित्रपटाचा अनकट आणि रॉ अवतार पाहायला मिळेल. पण घडलं उलटंच.

चित्रपट स्ट्रीम होताच चाहत्यांच्या आनंदाचं रूपांतर रागात झालंय. नेटफ्लिक्सने या चित्रपटात चक्क १० मिनिटं कापल्याचा आणि अनेक महत्त्वाचे संवाद सेन्सॉर केल्याचा आरोप करत चाहत्यांनी नेटफ्लिक्सला चांगलंच धारेवर धरलं आहे.

थिएटरमध्ये जेव्हा 'धुरंधर' प्रदर्शित झाला होता, तेव्हा त्याचा एकूण वेळ ३ तास ३४ मिनिटे इतका होता. मात्र, नेटफ्लिक्सवर हा चित्रपट ३ तास २५ मिनिटांचाच दिसत आहे. म्हणजेच जवळपास ९ ते १० मिनिटांचा हाय-व्होल्टेज ड्रामा गायब करण्यात आला आहे. विशेष म्हणजे, या चित्रपटाला 'A' प्रमाणपत्र मिळालेले असतानाही ओटीटीवर कात्री का चालवली? असा सवाल चाहते विचारत आहेत.

मिळालेल्या माहितीनुसार, माहिती आणि प्रसारण मंत्रालयाच्या सूचनेनुसार निर्मात्यांनी १ जानेवारीपासूनच थिएटरमध्ये चित्रपटाची दुसरी आवृत्ती पाठवली होती. नेटफ्लिक्सवरही हीच आवृत्ती प्रदर्शित करण्यात आली आहे.

यात 'बलोच' या शब्दासह अनेक शिव्या आणि वादग्रस्त संवाद म्यूट करण्यात आले आहेत. "आम्ही पैसे देऊन सबस्क्रिप्शन घेतो ते मूळ कलाकृती पाहण्यासाठी, मग हे सेन्सॉरशिपचं नाटक कशासाठी?" अशा शब्दांत सोशल मीडियावर नेटकऱ्यांनी संताप व्यक्त केला आहे.

'पिंकविला'च्या वृत्तानुसार, दिग्दर्शक आदित्य धर आणि निर्मात्यांनी नेटफ्लिक्सला अनकट वर्जन दिले होते. मात्र, नेटफ्लिक्सच्या स्वतःच्या काही नियमांमुळे त्यांनी चित्रपटात ही कपात केली आहे. केवळ लांबीत कपातच नाही, तर काही प्रेक्षकांनी चित्रपटाच्या कलर ग्रेडिंग आणि व्हिज्युअल क्वालिटीवरही नाराजी व्यक्त केली आहे. थिएटरमध्ये दिसलेला तो भव्य फील लॅपटॉप किंवा मोबाईलच्या स्क्रीनवर हरवल्याची भावना चाहते व्यक्त करत आहेत.

'धुरंधर'ने बॉक्स ऑफिसवर ५६ दिवसांत भारतामध्ये १००० कोटींचा आकडा पार केला आहे, तर जागतिक स्तरावर चित्रपटाने १,३४४.७४ कोटींची ऐतिहासिक कमाई केली आहे. २५० कोटींच्या बजेटमध्ये बनलेल्या या चित्रपटाने रणवीर सिंगला जागतिक सुपरस्टारच्या रांगेत नेऊन बसवलं आहे.