IPL 2026 Auction : पृथ्वी ते सरफराज... कसेबसे वाचले 5 खेळाडू, नाहीतर संपलं होतं करिअर!

आयपीएलच्या मिनी ऑक्शनमध्ये अनेक क्रिकेटपटू करोडपती झाले, तर काही खेळाडूंचं करिअरही वाचलं आहे. मोठं नाव, बराच अनुभव असूनही हे खेळाडू अनसोल्ड राहतील, अशी भीती होती, पण या खेळाडूंवर कशीबशी बोली लागली आणि ते बेस प्राईजवर विकले गेले.

भारतीय क्रिकेटचा पुढचा सुपरस्टार समजला गेलेला पृथ्वी शॉ मागच्या काही काळापासून वादात राहिला. खराब फॉर्म, फिटनेसची समस्या आणि बेशिस्तपणाच्या आरोपांमुळे पृथ्वीची ब्रँड व्हॅल्यूही कमी झाली. पहिल्या दोन राऊंडमध्ये अनसोल्ड राहिल्यानंतर पृथ्वीला दिल्ली कॅपिटल्सने 75 लाखांना विकत घेतलं.

टीम इंडियातून बाहेर असलेल्या सरफराज खानला सीएसकेने लाईफलाईन दिली आहे. लिलावाच्या काही तास आधी सरफराजने 22 बॉलमध्ये 73 रनची वादळी खेळी केली. पृथ्वी प्रमाणेच सरपराजवरही सुरूवातीला कुणी बोली लावली नाही, पण शेवटच्या राऊंडमध्ये सीएसकेने त्याला 75 लाखांना टीममध्ये घेतलं. सरफराजने शेवटचा आयपीएल सामना 2023 साली दिल्लीकडून खेळला होता.

राहुल त्रिपाठीसाठी केकेआरने 75 लाख रुपये मोजले. 2022 च्या मेगा ऑक्शनमध्ये हैदराबादने त्रिपाठीला टीममध्ये घेतलं, पण खराब कामगिरीनंतर हैदराबादने त्याला रिलीज केलं. 2025 मध्ये सीएसकेने राहुल त्रिपाठीवर बोली लावली, पण तिथेही त्याची कामगिरी निराशाजनक झाली. 5 सामन्यांमध्ये त्रिपाठीने 11 च्या सरासरीने 55 रन केले. सीएसकेने त्याला 3 कोटी 40 लाखांना विकत घेतलं होतं.

अंडर-19 वर्ल्ड कपच्या दमदार कामगिरीनंतर शिवम मावीकडे टीम इंडियाचा पुढचा फास्ट बॉलर म्हणून पाहिलं गेलं. 2018 ते 2022 पर्यंत मावी केकेआरकडे होता, पण सततच्या दुखापतींमुळे तो फार खेळू शकला नाही. आता मावीला हैदराबादने 75 लाखांमध्ये विकत घेतलं.

कार्तिक त्यागी जेवढ्या वेगाने प्रकाशझोतात आला तेवढ्याच वेगाने गायबही झाला. फास्ट बॉलर असलेल्या कार्तिकची तुलना ब्रेट लीसोबतही केली गेली. छोट्या करिअरमध्ये कार्तिक राजस्थान, हैदराबाद आणि गुजरातकडे होता. आता लिलावामध्ये कार्तिक त्यागीसाठी केकेआरने 30 लाख रुपये मोजले.