Pune News: पुण्याची हवा बदलली! आता शहरात घ्या मोकळा श्वास, देशात दहावा क्रमांक

पुण्यातील प्रदूषणाचे प्रमाण कमी करण्यासाठी पुणे महापालिकेकडून सातत्याने प्रयत्न सुरू आहेत. नागरिकांना सीएनजी आणि इलेक्ट्रिक वाहने खरेदी करण्यासाठी प्रोत्साहित केले जात असून, महापालिकेकडून नव्याने खरेदी होणारी किंवा भाड्याने घेण्यात आलेली सर्व वाहने इलेक्ट्रिकमध्ये रूपांतरित करण्यात आली आहेत.जुलै 2025 पर्यंत पुणे शहरात तब्बल 41 लाख 16 हजार 310 नोंदणीकृत वाहने रस्त्यावर होती. यापैकी इलेक्ट्रिक वाहनांची संख्या वेगाने वाढली असून, 33 हजारांवरून ती 95 हजारांपर्यंत पोहोचली आहे.याशिवाय, पुण्यातील सुमारे 70 टक्के रस्ते ग्रीन बेल्ट वर्गात मोडतात, ज्यामुळे हवेच्या गुणवत्तेत सुधारणा करण्यास हातभार लागतो आहे.

शहरातील घनकचऱ्याची विल्हेवाट योग्य पद्धतीने लावण्यावर पुणे महापालिका विशेष भर देत आहे. केंद्र सरकारकडून पुणे महापालिकेला 15 व्या वित्त आयोगांतर्गत एकूण 399 कोटी रुपयांचा निधी मंजूर झाला असून, त्यापैकी 162 कोटी रुपये प्रत्यक्षात मिळाले आहेत. या निधीतून वायूप्रदूषण कमी करण्यासाठी विविध उपाययोजना राबविण्यात आल्या आहेत.