Pune Crime : डेटवर जाण्यास तरुणीचा नकार! AI चा वापर करत तरुणाने केला भयंकर कांड, पुण्यासह मुंबईही हादरलं!

चिराग राजेंद्र थापा असे या आरोपीचे नाव आहे. या प्रकरणाची सुरुवात एका ऑनलाइन गेमिंग प्लॅटफॉर्मवर झाली होती, जिथं चिरागची ओळख पीडित तरुणीशी झाली होती. ओळखीनंतर एका आठवड्यातच चिरागने तरुणीकडे गर्लफ्रेंड बनून डेटवर येण्याची मागणी केली. मात्र, तरुणीने त्याला स्पष्टपणे नकार दिला. या नकाराने संतापलेल्या आरोपीने लगेचच सूडाचा मार्ग निवडला. त्याने आर्टिफिशियल इंटेलिजन्स (AI) टेक्नॉलॉजीचा गैरवापर करून तरुणीचे अश्लील फोटो तयार केले.

या कृतीवर न थांबता, चिरागने तिच्या नावाने 13 सोशल मीडिया प्लॅटफॉर्मवर बनावट अकाऊंट्स उघडून ते अश्लील फोटो व्हायरल केले. एवढ्यावरच तो थांबला नाही, तर त्याने तिच्या मैत्रिणींचेही असेच आक्षेपार्ह फोटो तयार केले आणि तरुणीला धमक्या दिल्या की, तिने मैत्रिणींना 'माझ्याशी बोलायला सांगा' अन्यथा हे फोटोही व्हायरल करेन.

या गंभीर प्रकारानंतर तरुणीने बावधन पोलिस स्टेशनमध्ये तक्रार दाखल केली. पोलिसांनी घटनेचे गांभीर्य लक्षात घेऊन लगेच तपास सुरू केला. टेक्निकल अ‍ॅनालिसिस आणि सायबर तपासाच्या आधारावर पोलिसांनी तातडीने आरोपीचा माग घेतला. अवघ्या काही तासांतच चिराग थापाला विरारमधून अटक करण्यात आली. AI टेक्नॉलॉजीच्या वाढत्या गैरवापरातून घडलेला हा गुन्हा आणि त्यावर पोलिसांनी केलेली जलद कारवाई सायबर गुन्हेगारांसाठी एक कडक संदेश देणारी आहे.