भुशी, ताम्हिणी दुर्घटनांनंतर मोठा निर्णय! पुण्यातील 'या' प्रसिद्ध पर्यटनस्थळांवर जमावबंदी

पुणे : मागील काही दिवसात भुशी डॅम आणि ताम्हिणी घाट परिसरात घडलेल्या दुर्घटनांमध्ये 6 जणांनी आपला जीव गमावला. या पार्श्‍वभूमीवर आता प्रशासन अलर्ट झालं असून पुणे जिल्ह्यातील मावळ, मुळशी, हवेली, आंबेगाव, खेड, जुन्नर, भोर आणि वेल्हा या 8 तालुक्यांमधील गड-किल्ले, पर्यटनस्थळं, धरणं आणि धबधबे अशा पर्यटनस्थळी जमावबंदीचे आदेश जारी करण्यात आले आहेत. त्यानुसार, आठही तालुक्यांमधील एकाही पर्यटनस्थळी 5 किंवा त्यापेक्षा जास्त व्यक्तींना एकत्र येण्यास बंदी घालण्यात आली आहे.

हेही वाचा : Pune News: पर्यटकांसाठी 'हा' सुप्रसिद्ध धबधबा बंद! नियम मोडल्यास होईल कारवाई

धोकादायक पर्यटनामुळे अपघात होण्याच्या घटनांमध्ये वाढ झाली आहे. दरवर्षी यात अनेकजण आपला जीव गमावतात. यंदा 2 दिवसांतच 2 दुर्घटना घडल्या. त्या पार्श्वभूमीवर जिल्हाधिकारी डॉ. सुहास दिवसे यांनी मंगळवारी जमावबंदीचे आदेश लागू केले. वेगानं वाहणाऱ्या पाण्यात उतरणं, खोल पाण्यात उतरणं, त्यात पोहणं, इत्यादींवर आता बंदी असेल. तसंच धबधबे, दऱ्यांचे कठडे, धोकादायक वळणं, इत्यादी ठिकाणी सेल्फी काढण्यास आणि नैसर्गिक धबधब्यांच्या ठिकाणी मद्यपान करण्यास बंदी घालण्यात आली आहे. 31 जुलैपर्यंत हे आदेश पाळणं बंधनकारक आहे.