'ई-शिवनेरी'च्या फास्टटॅगमध्ये खडखडाट; बस तासभर नाक्यावरच, अखेर टोल भरण्यासाठी प्रवाशांनी जमा केली वर्गणी

पुणे: महाराष्ट्र राज्य मार्ग परिवहन महामंडळाच्या (ST) अत्यंत प्रतिष्ठेच्या समजल्या जाणाऱ्या 'ई-शिवनेरी' बसचा एक संतापजनक आणि तितकाच लाजीरवाणा प्रकार समोर आला आहे. बसच्या 'फास्टटॅग'मध्ये पुरेशी रक्कम नसल्यामुळे ही बस तळेगाव टोलनाक्यावर तब्बल एक तास रोखून धरण्यात आली. प्रशासकीय हलगर्जीपणामुळे अखेर कंटाळलेल्या प्रवाशांनी स्वतःच्या खिशातून पैसे काढून टोल भरला. त्यानंतरच पुण्याच्या दिशेने बसचा मार्ग मोकळा झाला.