जमीन खरेदी करताना 'ही' एकच चूक पडते महागात, मग बसावं लागतं रडत! तुम्हाला माहितीये ना?

अरुण कुमार सिंह यांनी सांगितलं की, कोणतीही जागा खरेदी करण्यापूर्वी तिच्याविषयी पूर्ण माहिती मिळवा. ज्या गावात जमीन खरेदी करायची आहे, त्या गावातील तलाठ्याकडून जमिनीचा नवा सातबारा काढून घ्या. त्यावरील फेरफार आणि आठ-अ उतारे तपासा. सातबाऱ्यावरील नावं ही विक्री करणाऱ्या व्यक्तीचींच आहेत ना हे लक्षपूर्वक पाहा. जमिनीवर कोणत्याही प्रकारचं कर्ज काढलेलं नाही ना, याचीही खात्री करून घ्या. जमिनीवर कोणता न्यायालयीन खटला सुरू आहे का, हेसुद्धा तपासा. भविष्यात त्या जमिनीतून नियोजित मार्गाची उताऱ्यावर नोंद नाही ना, याची खात्री करा. जमिनीचे कमीत कमी 12 वर्षांचे सातबारा आणि फेरफार उतारे पाहा. त्यामुळे तिच्या मालकी हक्कात वेळोवेळी काय बदल झाले, हे लक्षात येईल. तहसील कार्यालयातील अभिलेख कक्षात जमिनीच्या इतिहासाशी संबंधित सर्व माहिती मिळेल.

सातबारा उतारा मिळाल्यानंतर ती जमीन कोणत्या भूधारणा पद्धतीअंतर्गत येते, हे पाहा. ज्या गटातील शेतजमीन खरेदी करायची आहे, त्या गटाचा नकाशा पाहणंही आवश्यक आहे. त्यामुळे जमिनीची हद्द कळते. शिवाय त्या जमिनीवर शेतरस्ता नाही ना, हेदेखील पाहावं. त्या जमिनीबाबत कोणाचीही काही हरकत नाही, याची खात्री झाली की, नंतरच जमीन खरेदी करा.

नोंदणी हा केवळ मालकी हस्तांतरणाचा दस्तऐवज असतो, मालकीचा नाही. त्यामुळे मालमत्तेची नोंदणी झाल्यावर तातडीने त्या नोंदणीच्या आधारे म्यूटेशन करून घ्या. तेव्हा तुम्ही त्या मालमत्तेचे पूर्ण मालक व्हाल.