यंदाच्या नवरात्रीच्या तिथी मध्ये मोठा बदल! उपवासाचे उत्थापन कधी करावं? घट कधी उठवावेत? पाहा

देशभरात उत्साहात साजरा केला जाणाऱ्या सणांपैकी शारदीय नवरात्र उत्सव अतिशय उत्साहात साजरा केला जातो. यंदाच्या 2024 वर्षांमध्ये नवरात्र उत्सवात तिथी मध्ये बदल झाल्याचा पाहायला मिळतो. यंदाच्या नवरात्र उत्सवात नवमी आणि दशमी ही तिथी एकत्र म्हणजे एकाच दिवशी आलेले आहेत.

यंदा 12 ऑक्टोबर 2024 ला नवमी आणि दशमी तिथी एकत्र आल्यानं अनेक उपासकांना घट उठवायचे कधी आणि उपवासाचे उत्थापन पण कधी करायचं यासंदर्भात अनेक प्रश्न निर्माण झालेत. दसरा आणि नवमीचा जो घट उठवण्याचा जो कार्यक्रम आहे तो आपल्याला 12 तारखेला म्हणजेच दसऱ्या दिवशीच करावा लागणार आहे. महाअष्टमीचा आणि महानवमीचा उपवास हा शुक्रवारी म्हणजेच 11 तारखेला करायचा आहे. महाअष्टमी महानवमीचा उपवास एकाच दिवशी आलेला आहे. बऱ्याच वेळा तिथींची समाप्ती ही वेगवेगळ्या वेळी येत असल्याने हा विषय निर्माण होतो आणि यावर्षी तो तसा झालेला आहे त्या कारणांनी अष्टमी नवमीचा उपवास एकत्र आणि घट उठवणे आणि दसरा हा एकत्र एकाच दिवशी आलेत. 11 तारखेला अष्टमीचा आणि नवमीचा उपवास आणि 12 तारखेला नवमीचा उपवासाचे पारणे करायचे आहे, असं ज्योतिषशास्त्री राहुल कदम सांगतात.

घट उठवताना शास्त्रात काही नियम सांगितले आहेत. नवमीला घट उठवून आपल्या कुलदेवतेला अभिषेक करावा. त्यानंतर जो टाक असेल त्याच्यावरती श्री सूक्ताने अभिषेक करून कुंकूमार्चन करावं आणि त्याची देव्हाऱ्यावरती स्थापना करावी. स्थापना केल्यानंतर महानैवेद्य दाखवून आपल्या उपवासाचे पारणे करून घ्यावे, असं ज्योतिषशास्त्री राहुल कदम यांनी सांगितले.

शारदीय नवरात्रोत्सवाच्या दशमी तिथीला विजयादशमी दसरा असं म्हटलं गेलं आहे. हा मुहूर्त अत्यंत शुभ मुहूर्तांपैकी एक मानला जातो. साडेतीन मुहूर्तांपैकी एक शुभ मुहूर्त असलेल्या या दसऱ्या दिवशी नवीन कार्याची सुरुवात केली जाते. तसेच नवीन वास्तू खरेदी, वाहन खरेदी किंवा नव्या काही गोष्टींची सुरुवात करायची असेल तर हा मुहूर्त अत्यंत शुभ मानला जातो. यंदाचा दसऱ्याचा जो विजय मुहूर्त आहे तो यावेळी दुपारी 02:22 ते 03:09 वाजेपर्यंत आहे. विजय मुहूर्त साधता आला तर साधून घ्यावा.

महानवमीच्या म्हणजेच खंडे नवमीच्या या दिवशी महिषासुराचा वधाचा दिवस मानला जातो. या दिवशी उपवास करणे आणि कन्या पूजा करणे या प्रथा आहेतच पण महानवमीच्या दिवशी आपल्या व्यवसायाच्या ठिकाणी आणि घरांमधील आयुध, शस्त्रं, यंत्रसामग्री आणि इतर अनेक वस्तूंचे पूजन करून त्यांचा सन्मान केला जातो. दसरा हा अधर्मावर धर्माचा आणि असत्यावर सत्याचा विजय म्हणून साजरा केला जातो.