IPL 2024 : धोनी IPL 2024 चा पूर्ण सिझन खेळणार की नाही? CSK च्या कोचने दिली महत्वाची माहिती

चेन्नई सुपरकिंग्सचे हेड कोच स्टीफन फ्लेमिंगने सांगितले की, "आम्ही 2022 मध्ये एम एस धोनीने कर्णधारपद सोडावे यासाठी तयार नव्हतो. धोनीला क्रिकेटची चांगली माहिती आहे आणि आम्ही युवा खेळाडूंना या भूमिकेसाठी तयार करू इच्छित होतो. यावेळी आम्ही तयार आहोत. मागील वेळी जेव्हा धोनीने कर्णधारपद सोडण्याचा निर्णय घेतला तेव्हा आम्ही सर्व स्तब्ध झालो होतो कारण आम्ही यासाठी तयारच नव्हतो. परंतु यावेळी आम्हाला माहित होते".

कोच स्टीफन फ्लेमिंग म्हणाला, "आम्ही नवीन कर्णधार तयार करण्यासाठी मेहनत घेत होतो. युवा खेळाडूंवर विश्वास दाखवल्याचा आम्हाला नेहमीच फायदा मिळालेला आहे. मी ऋतुराज सोबत नेतृत्व करण्याबाबत बोललो आहे. त्याच्याकरता ही एक उत्तम संधी आहे". स्टीफन फ्लेमिंग पुढे धोनी विषयी बोलताना म्हणाला, "आयपीएलपूर्वी झालेल्या सराव सामन्यात धोनी फिट दिसत आहे. यावेळी त्याच्या फिटनेसबाबत कोणतीही अडचण नाही. त्याने सराव सामन्यात खेळाचे चांगले प्रदर्शन केले आहे त्यामुळे मला आशा आहे की तो संपूर्ण सिझन खेळू शकेल'.

धोनीने चेन्नई सुपरकिंग्सच्या कर्णधारपदाचा राजीनामा दिल्यानंतर आयपीएल 2024 हा धोनीचा शेवटचा आयपीएल सिझन असेल अशी चर्चा आहे. गेल्यावर्षी एम एस धोनी संपूर्ण सिझन फिट नव्हता, आयपीएल संपल्यावर त्याच्या गुडघ्यावर शस्त्रक्रिया देखील करण्यात आली. त्यानंतर यंदाच्या आयपीएलसाठी त्याने आपल्या फिटनेसवर खूप काम केले आहे. धोनी जुलै 2024 मध्ये 43 वर्षांचा होईल.