Parle तब्बल 400 रुपये, हल्दीरामची भुजिया, बिर्याणी मसाला तर… परदेशात भारतीय स्नॅक्स इतके महाग का?

बिर्याणी आणि बटर चिकनसारखे पदार्थ तर परदेशातील अनेक रेस्टॉरंटमध्ये सहज मिळतात, पण खरी मजा तेव्हा येते जेव्हा चहासोबत पारले-जीसारखा बिस्किटाचा पॅक, हल्दीरामची आलू भुजिया किंवा खमंग नमकीन खायला मिळेल. तेव्हा कुठे आपल्या मनाची शांती होते. पण तुम्हाला माहितीय का की आपल्या भारतात मिळणाऱ्या वस्तूंची परदेशात किंमत किती आहे?

खरंतर भारतीय वस्तूंचा परदेशातील किंमतींचा आकडा हा खरोखर थक्क करणारा आहे.

अमेरिकेतील डलास येथे असलेल्या वॉलमार्ट स्टोअरमधून नुकताच एक व्हिडिओ समोर आला आहे ज्याने अनेक भारतीयांच्या भावना जाग्या केल्या. या व्हिडिओमध्ये दाखवण्यात आलं की वॉलमार्टच्या शेल्फवर भारतीय स्नॅक्स आणि रेडी-टू-ईट पॅकेज्ड फूड्स अगदी ‘मिनी इंडिया’सारखे सजवले होते.

मसाल्यांच्या रॅकमध्ये बिर्याणी मसाला, तंदुरी मसाला, फ्रायड फिश मसाला, बटर चिकन सॉस असे मसाले उपलब्ध होते. रेडी-टू-ईट बिर्याणी फक्त 3 डॉलर (सुमारे 260 रुपये) ला विक्रीस ठेवली होती. पारले हाइड अँड सीक बिस्किट्सची किंमत 4.50 डॉलर (सुमारे 400 रुपये) होती.

या व्हिडिओवर लोकांनी वेगवेगळ्या प्रतिक्रिया दिल्या. कुणी म्हणाले, “वा, पण किती महाग आहे!” तर काहींनी मजेत लिहिले, “पटेल भाई सगळं डबल प्राइसला विकत आहेत.” एका युजरने लिहिले, “भारतामध्ये 500 रुपयांत काही खास मिळत नाही, पण अमेरिकेत 96 डॉलरच्या पगारात खूप काही विकत घेता येतं.” तर काहींनी कॅनडाशी तुलना करत किंमती थोड्या जास्त असल्याचं नमूद केलं.