समुद्राच्यामध्ये एक असं बेट, जिथे पुरुषांना नो एन्ट्री; महिलांच्या सिक्रिट जगात असं आहे तरी काय?

Published by:Devika Shinde

Last Updated:Jan 08, 2026 10:30 PM IST

आता कल्पना करा, एका अशा सुंदर बेटाची जिथे चहूबाजूंनी निळाशार समुद्र आहे, गर्द झाडी आहे आणि सर्वात महत्त्वाचं म्हणजे तिथे तुम्हाला 'जज' करणारं कोणीही नाही. इतकंच नाही, तर तिथे पुरुषांना येण्यास सक्त मनाई आहे.

मुंबई : आपल्या धावपळीच्या आयुष्यात प्रत्येक स्त्री एका अशा क्षणाच्या शोधात असते, जिथे तिला कोणाचंही दडपण नसेल. कधी ऑफिसचं टेन्शन, कधी कुटुंबाच्या जबाबदाऱ्या, तर कधी समाजाच्या नजरा... या सगळ्यात स्वतःसाठी वेळ काढणं जणू अशक्यच होतं. आता कल्पना करा, एका अशा सुंदर बेटाची जिथे चहूबाजूंनी निळाशार समुद्र आहे, गर्द झाडी आहे आणि सर्वात महत्त्वाचं म्हणजे तिथे तुम्हाला 'जज' करणारं कोणीही नाही. इतकंच नाही, तर तिथे पुरुषांना येण्यास सक्त मनाई आहे.

हे ऐकायला एखाद्या कल्पनेतल्या जगासारखं वाटत असलं, तरी प्रत्यक्षात असं एक बेट अस्तित्वात आहे. जिथे महिला केवळ सुट्टी घालवायला जात नाहीत, तर स्वतःला पुन्हा नव्याने शोधायला जातात.

फिनलंडच्या दक्षिण किनारपट्टीवर, बाल्टिक समुद्राच्या लाटांमध्ये दडलेलं आहे 'सुपरशी आयलंड' (SuperShe Island). हेलसिंकीपासून साधारण 100 किलोमीटर अंतरावर असलेलं हे 8.4 एकरचं बेट म्हणजे शांततेचा एक महासागर आहे. खडकाळ किनारे, उंच झाडं आणि मोकळं आकाश असं निसर्गाचं वरदान या बेटाला लाभलं आहे. पण या बेटाची खरी ओळख निसर्ग नाही, तर इथला एक खास नियम आहे.

पुरुषांना प्रवेश नाही, पण का?

'सुपरशी आयलंड'वर पुरुषांना येण्याची परवानगी नाही. हा नियम कोणाचा द्वेष करण्यासाठी नाही, तर महिलांना एक 'मोकळा श्वास' घेता यावा यासाठी आहे. इथे येणाऱ्या महिला सांगतात की, जेव्हा आसपास पुरुष नसतात, तेव्हा त्या अधिक मोकळेपणाने वावरू शकतात. कोणाला प्रभावित करण्याची धडपड नसते किंवा कोणाच्या नजरेचं दडपण नसतं. इथे संवाद सहज होतो आणि शांतता अधिक सुखावह वाटते.

क्रिस्टिना रॉथ यांची अनोखी संकल्पना

या बेटाची निर्मिती एका मोठ्या टेक कंपनीच्या माजी सीईओ क्रिस्टिना रॉथ (Kristina Roth) यांनी केली आहे. कॉर्पोरेट जगातील धावपळ अनुभवल्यानंतर त्यांना जाणीव झाली की, स्त्रियांना अशा एका जागेची गरज आहे जिथे त्या स्वतःशी जोडल्या जातील. त्यातूनच या 'वुमन-ओन्ली' आयलंडचा जन्म झाला.

काय असतं या बेटावर?

या बेटावर एका वेळी फक्त 8 महिलाच राहू शकतात. इथे कोणतंही कडक शेड्युल नसतं.

योगा आणि ध्यान: सकाळी समुद्राच्या लाटांच्या आवाजात योगासनं.

जंगलातून फेरफटका आणि कयाकिंगचा आनंद.

फिनलंडची पारंपारिक वाफ घेण्याची पद्धत (Sauna) इथे अनुभवता येते.

इथे मिळणारे जेवण स्थानिक आणि अतिशय आरोग्यदायी असते.

इथे जगभरातून लेखिका, कलाकार, उद्योजिका आणि विचारवंत महिला येतात. इथे आल्यावर तुमचं पद, तुमची ओळख मागे सुटते. तुम्ही फक्त एक 'स्त्री' म्हणून तिथे वावरता. हे केवळ एक रिसॉर्ट नसून स्वतःच्या आत डोकावून पाहण्याचं एक माध्यम आहे. आजच्या गोंगाटाच्या जगात 'सुपरशी आयलंड' हे सिद्ध करतं की, महिलांना केवळ ब्रेक नकोय, तर त्यांना थोडा वेळ 'शांतता' हवी आहे.

view comments