Trending:

शेतकऱ्यांना GST मध्ये सूट दिल्याने कोणते फायदे मिळणार? कृषीमंत्री चौहानांनी दिली महत्वाची माहिती

Published by:Ajit Bhabad

Last Updated:September 11, 2025 1:09 PM IST

GST in Agriculture : केंद्र सरकारने जीएसटी दरांमध्ये केलेल्या बदलांमुळे शेतकरी, पशुपालक आणि कृषी क्षेत्राशी संबंधित कामगारांना मोठा दिलासा मिळणार आहे.

मुंबई : केंद्र सरकारने जीएसटी दरांमध्ये केलेल्या बदलांमुळे शेतकरी, पशुपालक आणि कृषी क्षेत्राशी संबंधित कामगारांना मोठा दिलासा मिळणार आहे. केंद्रीय कृषी मंत्री शिवराज सिंह चौहान यांनी शेतकऱ्यांना कोणत्या घटकातून किती फायदा होईल याबाबतची सविस्तर माहीती दिली आहे.

1) कृषी यांत्रिकीकरणातील दिलासा

ट्रॅक्टर आणि शेतीसाठी लागणारी उपकरणे खरेदी करणे आता सोपे झाले आहे. १८०० सीसीपर्यंतच्या ट्रॅक्टरवरील जीएसटी ५ टक्के करण्यात आला आहे. टायर, ट्यूब, हायड्रॉलिक पंप यांसारख्या ट्रॅक्टरच्या सुट्या भागांवरही करदर १८ टक्क्यांवरून ५ टक्क्यांवर आणला आहे. स्प्रिंकलर, ठिबक सिंचन प्रणाली, कापणी यंत्रे आणि कंपोस्ट मशीन यावरही फक्त ५ टक्के जीएसटी लागू राहील. या निर्णयामुळे कृषी यंत्रे स्वस्त होतील, लहान व मध्यम शेतकरी सहजतेने ती खरेदी करू शकतील आणि उत्पादकता वाढेल.

2) खतांच्या किमतीत घट

अमोनिया, सल्फ्यूरिक आम्ल व नायट्रिक आम्ल यांसारख्या खतांच्या कच्च्या मालावरील जीएसटी १८ टक्क्यांवरून ५ टक्क्यांवर कमी करण्यात आला आहे. यामुळे उत्पादन खर्च घटेल आणि शेतकऱ्यांना खते स्वस्त दरात उपलब्ध होतील.

3) सेंद्रिय शेतीला चालना

जैविक कीटकनाशके व सूक्ष्म पोषक घटकांवरील जीएसटी १२ टक्क्यांवरून ५ टक्क्यांवर आणण्यात आला आहे. यामुळे पर्यावरणपूरक उत्पादने स्वस्त होऊन शेतकरी रासायनिक कीटकनाशकांऐवजी सेंद्रिय शेतीकडे वळतील. मातीची सुपीकता व पिकांची गुणवत्ता सुधारेल.

4) फळे, भाज्या व अन्न प्रक्रिया

तयार केलेली किंवा संरक्षित फळे, भाज्या आणि काजू यावरचा कर १२ टक्क्यांवरून ५ टक्के करण्यात आला आहे. या निर्णयामुळे अन्न प्रक्रिया उद्योगाला चालना मिळेल, नाशवंत वस्तूंचा अपव्यय कमी होईल आणि शेतकऱ्यांना उत्पादनाची चांगली किंमत मिळेल.

5) दुग्ध क्षेत्राला बळ

दूध व चीजला पूर्णपणे जीएसटीमधून वगळले गेले आहे. तूप, लोणी व इतर दुग्धजन्य पदार्थांवरील जीएसटी १२ टक्क्यांवरून ५ टक्क्यांवर आणला आहे. तसेच, दुधाच्या कंटेनरवरील करही ५ टक्के करण्यात आला आहे. यामुळे दुग्ध उत्पादकांचा खर्च कमी होईल आणि ग्राहकांना स्वस्त दरात दूध उत्पादने मिळतील.

6) मत्स्यपालन व मध उत्पादन

तयार किंवा जतन केलेल्या माशांवरील जीएसटी १२ टक्क्यांवरून ५ टक्के करण्यात आला आहे. त्यामुळे मत्स्यपालन उद्योगाला चालना मिळेल. नैसर्गिक आणि कृत्रिम मधावरील कर कमी झाल्याने मध उत्पादक, ग्रामीण महिला आणि आदिवासी समुदायांना फायदा होईल.

7) सौर उपकरणे व तेंदूपत्ता

सौरऊर्जेवर आधारित उपकरणांवरील जीएसटी १२ टक्क्यांवरून ५ टक्के करण्यात आला आहे. यामुळे शेतकऱ्यांना सिंचनासाठी स्वस्त आणि कार्यक्षम साधने उपलब्ध होतील. तेंदूपत्त्यावरचा कर १८ टक्क्यांवरून ५ टक्क्यांवर आणल्यामुळे ओडिशा, छत्तीसगड व मध्य प्रदेशातील आदिवासी कुटुंबांच्या उत्पन्नात वाढ होईल.

Location :

Mumbai,Maharashtra

First Published :

September 11, 2025 1:09 PM IST

शेतकऱ्यांना GST मध्ये सूट दिल्याने कोणते फायदे मिळणार? कृषीमंत्री चौहानांनी दिली महत्वाची माहिती