पाव्हन जेवला काय...! संपूर्ण महाराष्ट्राला नाचवलं, आता टेलिव्हिजन गाजवणार गौतमी पाटील

गौतमी पाटील ठसकेबाज डान्स आणि स्टेज परफॉर्मन्समुळे संपूर्ण महाराष्ट्र गाजवला. महाराष्ट्रातील प्रत्येक जिल्ह्यात गौतमी पाटीलने स्टेज शो केले. ती महाराष्ट्रातली सगळ्यात चर्चेत असलेली नृत्यांगना बनली आहे.

आता ती लवकरच छोट्या पडद्यावरही आपली छाप पाडायला सज्ज झाली आहे. 26 एप्रिल पासून स्टार प्रवाह वाहिनीवर सुरु होणाऱ्या शिट्टी वाजली रे या नवीन कार्यक्रमात गौतमी भाग घेत आहे.

गौतमीचं नृत्यकौशल्य तर महाराष्ट्राला माहितीच आहे पण आता शिट्टी वाजली रे या कार्यक्रमातून ती स्वयंपाकातही हात आजमावणार आहे.

या कार्यक्रमात सहभागी कलाकारांना वेगवेगळे पदार्थ बनवण्याचे टास्क दिले जाणार आहेत. पण हे पदार्थ बनवताना त्यांच्या गोंधळलेल्या प्रतिक्रिया आणि धमाल पाहायला मिळणार आहे.

या कार्यक्रमाविषयी बोलताना गौतमीने सांगितलं, "स्टार प्रवाह माझ्यासाठी खूप खास आहे. याच वाहिनीमुळे मला एक वेगळी ओळख मिळाली."

"शिट्टी वाजली रे हे माझं टीव्हीवरचं पहिलं काम आहे. खरं सांगायचं तर मला जेवण बनवता येत नाही, त्यामुळे हा कार्यक्रम माझ्यासाठी एक नवीन अनुभव असणार आहे."

हा कार्यक्रम केवळ पोटभरी जेवणासाठी नाही, तर हसता हसता पोट दुखेपर्यंत मनोरंजनासाठी आहे. कलाकारांच्या जोडीने स्वयंपाक करताना त्यांच्या मजेशीर गोंधळाचा आनंद प्रेक्षक घेणार आहेत.

अभिनेता अमेय वाघ या कार्यक्रमाचा होस्ट आहे. तर ‘पूर्णब्रह्म’ रेस्टॉरंटच्या संचालिका जयंती कठाळे सेलिब्रिटी शेफची भूमिका निभावणार आहेत.

शिट्टी वाजली रे हा शो 26 एप्रिलपासून दररोज रात्री 9 वाजता स्टार प्रवाहवर सुरू होणार आहे. गौतमी बरोबरच या कार्यक्रमात अभिनेत्री रूपाली भोसले, पुष्कर श्रोत्री, छोटा पुढेरी आणि स्मिता गोंदकर देखील असणार आहेत.