शो मस्ट गो ऑन! ज्योती चांदेकरांना कोण रिप्लेस करणार? नव्या 'पूर्णा आजी'बद्दल सुचित्रा बांदेकरांचा मोठा खुलासा

मुंबई: ‘ठरलं तर मग’ या लोकप्रिय मालिकेत ‘पूर्णा आजी’ची भूमिका साकारणाऱ्या ज्येष्ठ अभिनेत्री ज्योती चांदेकर यांच्या निधनाने सगळ्यांनाच धक्का बसला आहे.

त्यांच्या अभिनयाची आणि त्यांच्या व्यक्तिमत्त्वाची छाप कायम त्यांच्या चाहत्यांच्या आणि सहकाऱ्यांच्या मनात राहिली आहे.

ज्योती चांदेकर आता या जगात नाहीत, पण त्यांच्या भूमिकेचं काय होणार, असा प्रश्न सगळ्यांना पडला आहे. याच प्रश्नावर मालिकेच्या निर्मात्या सुचित्रा बांदेकर यांनी अखेर आपलं मौन तोडलं आहे.

ज्योती चांदेकर यांच्या निधनानंतर त्यांच्या जागेवर ‘पूर्णा आजी’ म्हणून कोणत्या अभिनेत्रीचा विचार केला जाईल, असा प्रश्न सुचित्रा बांदेकर यांना एका मुलाखतीत विचारण्यात आला होता.

या प्रश्नावर त्या खूप भावुक झाल्या आणि म्हणाल्या, “हा न भरून निघणारा लॉस आहे. त्या इतक्या लोकप्रिय अभिनेत्री आहेत. त्यांनी इतकी वर्षं काम केलं आहे आणि ‘पूर्णा आजी’ची अशी छाप सोडून गेल्या आहेत, ती भरून काढणं खूप कठीण आहे.”

त्या पुढे म्हणाल्या, “पण ‘शो मस्ट गो ऑन’… आम्हाला कोणत्याही एका कलाकाराला घेऊन हे काम करावं लागणार आहे, पण हे खूपच कठीण आहे.”

सुचित्रा बांदेकर यांनी सांगितलं की, सध्या ते कोणत्याही गोष्टीचा विचार करत नाहीत, कारण यातून सावरण्यासाठी त्यांना आणि प्रेक्षकांनाही वेळ हवा आहे. “ज्याप्रकारे चाहते कमेंट करत आहेत, प्रेक्षकही असं म्हणताएत की, ‘पूर्णा आजी म्हणून आम्ही दुसऱ्या कोणाला बघू शकत नाही.’ त्यामुळे या सगळ्याचा नीट विचार केला जाईल. मालिकेसाठी जे चांगलं असेल, ते आम्ही करू,” असं त्या म्हणाल्या.

याआधी सुचित्रा यांनी ज्योती चांदेकर यांचा एक खूपच भावनिक किस्सा शेअर केला होता. जेव्हा त्या रुग्णालयात होत्या, तेव्हा त्या आदेश बांदेकरांना म्हणाल्या होत्या, “सुचित्राला सांग, हा मला रिप्लेस करू नको. ‘पूर्णा आजी’ मीच करणार!” यावरून त्यांच्या कामावर त्यांचा किती जीव होता, हे दिसून येतं.