Weather Alert: पुणे-मुंबईतील हवामानात मोठे बदल, मराठवाड्यात आज काय स्थिती? हवामान विभागाचा अलर्ट

राज्यात गेल्या आठवड्यात थंडीची लाट होती. आता मात्र हवामानात मोठे बदल जाणवत आहेत. उत्तरेतून येणाऱ्या शीतलहरी घटल्याने गारठा कमी झाला आहे. आज, 16 डिसेंबरला देखील हवामानात पुन्हा बदल जाणवत आहेत. राज्यातील बहुतांश भागात हवामान कोरडे राहणार असून सकाळी हलकी थंडी, तर दिवसा उबदार वातावरण राहील. सोमवारच्या तुलनेत आज तापमानात फारशी घसरण नोंदलेली नाही, उलट काही भागांत किमान तापमान थोडेसे वाढलेले दिसत आहे.

मुंबई, पालघर आणि कोकण किनारपट्टीवर आज सकाळी हलका गारवा जाणवेल. मात्र किमान तापमान साधारण 20 ते 22 अंशांच्या दरम्यान राहील. सोमवारच्या तुलनेत किमान तापमानात 1 अंशाने वाढ दिसून आली आहे. दिवसा कमाल तापमान 32 अंशांच्या आसपास पोहोचण्याची शक्यता असून उन्हाची तीव्रता जाणवेल. पुढील दोन दिवसांतही या भागात हवामान साधारण असंच राहणार असून थंडी वाढण्याची चिन्हे नाहीत.

पुणे शहरात आज सकाळी तापमान सुमारे 14 ते 15 अंशांच्या आसपास नोंदवले गेले. मागील काही दिवसांच्या तुलनेत थंडीचा जोर काहीसा कमी झालेला दिसतो. दिवसा तापमान 30 अंशांच्या जवळ जाण्याची शक्यता आहे. पुढील दोन दिवसांतही पुण्यात कडाक्याची थंडी वाढण्याऐवजी हवामान कोरडे आणि तुलनेने उबदार राहण्याचा अंदाज हवामान विभागाने वर्तवला आहे.

मराठवाडा, विदर्भ आणि उत्तर महाराष्ट्रातही आज हवामान स्थिर राहणार आहे. काही ठिकाणी रात्री तापमान 12 ते 15 अंशांपर्यंत खाली येईल, मात्र दिवसा तापमानात वाढ होणार आहे. सोमवारच्या तुलनेत बहुतांश भागांत तापमानात मोठी घसरण दिसून आलेली नाही. पुढील दोन-तीन दिवसांतही हिवाळा असूनही थंडी मर्यादितच राहण्याची शक्यता आहे.

एकंदरीत, 16 डिसेंबर रोजी महाराष्ट्रात तापमानात मोठे चढ–उतार दिसून येत नाहीत. राज्यातील बहुतांश भागांत किमान तापमान साधारण 12 ते 22 अंशांच्या दरम्यान असून कमाल तापमान 30 ते 33 अंशांच्या आसपास आहे. सोमवारच्या तुलनेत काही ठिकाणी थंडी थोडीशी कमी झाल्याचे चित्र आहे. पुढील दोन ते तीन दिवसांत हवामान कोरडेच राहण्याचा अंदाज असून, हिवाळा असला तरी कडाक्याची थंडी जाणवणार नाही.