महाराष्ट्राची शान जगभरात! 'या' तिखट, चटकदार पदार्थाने मिळवला जागतिक नाश्त्यांच्या यादीत मानाचं स्थान!

भारतात विविध प्रकारचे पौष्टिक आणि चविष्ट नाश्त्याचे पदार्थ आहेत. आपल्या दिवसाची सुरुवात आवडीच्या पदार्थांनी करण्याची भारतीयांची सवय ही आपल्या स्थानिक संस्कृती आणि समाजाचा अविभाज्य भाग आहे. आता याच भारतीय नाश्त्याला जागतिक स्तरावर मान्यता मिळाली आहे.

'टेस्ट ॲटलास'ने जून २०२५ च्या आकडेवारीनुसार जाहीर केलेल्या यादीत, महाराष्ट्राची शान असलेल्या मिसळ पावने १८ वे स्थान पटकावले आहे. तर, पराठा २३ व्या क्रमांकावर आहे आणि दिल्लीचे प्रसिद्ध छोले भटुरे ३२ व्या स्थानावर विराजमान झाले आहेत.

मिसळ पावबद्दल बोलताना 'टेस्ट ॲटलास'ने म्हटले आहे की, "खरी मिसळ पाव तिखट असणं गरजेचं आहे. त्याचबरोबर ती कुरकुरीत असली पाहिजे. दिसताना ती एक कलाकृतीच वाटायला हवी, भरपूर रंगांनी भरलेली, साधारणपणे लाल, तपकिरी, केशरी आणि हिरव्या रंगांची." हे वर्णन मिसळ पावच्या लोकप्रियतेचं आणि तिच्या विविधतेचं उत्तम उदाहरण आहे.

या यादीतील पराठा आणि छोले भटुरे हे दोन्ही पारंपरिक उत्तर भारतीय पदार्थ आहेत. त्यांची लोकप्रियता केवळ उत्तर भारतातच नाही, तर देशाच्या इतर भागांमध्येही ते खूप प्रसिद्ध आहेत आणि त्यांचे स्वतःचे प्रादेशिक प्रकारही आहेत. दिल्लीतील स्ट्रीट फूडमध्ये छोले भटुरे हे सर्वात उत्साहवर्धक पदार्थांपैकी एक मानले जातात.

'टेस्ट ॲटलास'ने आपल्या इन्स्टाग्राम पेजवर केवळ टॉप ५० नाश्त्यांची नावे जाहीर केली असली तरी, त्यांच्या वेबसाइटवर ५१ ते १०० पर्यंतच्या रँकिंगमध्येही अनेक भारतीय पदार्थ समाविष्ट आहेत. या यादीत निहारी, श्रीखंड आणि पालक पनीर यांसारखे भारतीय पदार्थही आहेत. याआधीही 'टेस्ट ॲटलास'च्या 'जगातील सर्वोत्तम ब्रेड'च्या यादीत अनेक भारतीय खाद्यपदार्थांचा समावेश होता.

या जागतिक यादीत भारतीय पदार्थांनी मिळवलेलं स्थान हे आपल्या देशाच्या समृद्ध आणि वैविध्यपूर्ण खाद्यसंस्कृतीची साक्ष आहे. यामुळे केवळ भारतीयांनाच नाही, तर जगभरातील खाद्यप्रेमींनाही भारतीय नाश्त्याची चव चाखण्याची उत्सुकता निर्माण होईल.