प्रेमाचा भयंकर शेवट! बळजबरीने दिल्या गर्भपाताच्या गोळ्या; 5 महिन्यांच्या गरोदर तरुणीचा मृत्यू, बाॅयफ्रेंड झाला फरार...

मायापूर गावात राहणारी 22 वर्षांची तरुणी त्याच परिसरात राहणाऱ्या गोलू नावाच्या तरुणासोबत प्रेमसंबंधात होती. याच दरम्यान, ती तरुणी पाच महिन्यांची गर्भवती राहिली. सध्या कुटुंबियांच्या तक्रारीनंतर पोलिसांनी या प्रकरणाचा तपास सुरू केला आहे. कुटुंबियांचा आरोप आहे की, गोलू विश्वकर्मा आणि त्याच्या मामा मनोज विश्वकर्मा यांनी मिळून त्यांच्या मुलीला जबरदस्तीने गर्भपाताच्या गोळ्या दिल्या. या गोळ्या दिल्यानंतर मुलीची तब्येत बिघडायला सुरुवात झाली. त्यानंतर मुलीचा प्रियकर आणि त्याच्या मामाने तिला एका ऑटोमधून मेडिकल कॉलेज हॉस्पिटलमध्ये आणले. मुलीची गंभीर अवस्था पाहून ते दोघेही तिथून पळून गेले.

इथे हॉस्पिटल व्यवस्थापनाने या घटनेची माहिती मृत तरुणीच्या कुटुंबियांना दिली. त्यानंतर घटनास्थळी पोहोचलेल्या कुटुंबियांना संपूर्ण प्रकार समजला. आता या प्रकरणात कुटुंबिय न्यायासाठी विनवणी करत आहेत. सध्या पोलिसांनी मृतदेहाचा पंचनामा करून आणि पोस्टमॉर्टमनंतर मृतदेह कुटुंबियांच्या ताब्यात दिला आहे. या प्रकरणी तक्रार दाखल झाल्यानंतर पोलिसांनी तपास सुरू केला आहे.