थारा पैसा, थारी गाडी, थारा बंगला, हे सारं आलं कुठून? खोक्याचा नंगानाच सुरूच, पैशात लोळतानाचा नवा VIDEO

सतीश भोसले उर्फ खोक्याचा एक नवा व्हिडिओ व्हायरल होत असून ज्यात पाचशे, दोनशे आणि शंभर रुपयांची बंडले समोरच्या टेबलावर ठेवली आहेत. त्या बंडलांमधील नोटा त्याच्या अंगावर उधळल्या जात आहेत. त्यामुळे सतीश भोसले उर्फ खोक्याकडे एवढे पैसे आले कुठून असा सवाल उपस्थित केला जात आहे.

पैशात लोळतानाच खोक्या पाहून तो नेमका काय करतो, त्याचा व्यवसाय कोणता, त्याच्याकडे एवढी संपत्ती आली कुठून, असे सवाल बीड जिल्ह्यासह संपूर्ण महाराष्ट्र विचारतोय. बरं या चित्रफितीला थारा पैसा, थारी गाडी, थारा बंगला... असे हिंदी चित्रपटसृष्टीतील लोकप्रिय गीत लावून आपल्या संपत्तीचे दर्शन करण्याचा खोक्याचा उद्देश स्पष्ट दिसतो आहे. त्यामुळे त्याच्या लक्ष्मी दर्शनाच्या स्त्रोताची पोलीस चौकशी करणार आहेत का, असेही प्रश्न सध्या नागरिक विचारत आहेत.

सतीश भोसले उर्फ खोक्या हा शिरूरमध्ये व्याजाने पैसे देतो, असे सांगितले जाते. व्याजाच्या पैशातून जमवलेल्या अवैध मायेचे दर्शन तो नवनव्या चित्रफिती बनवून लोकांना देत असतो. तसेच हरीण आणि इतरही वन्यजीवांच्या शिकारीचा त्याला भारी नाद आहे. त्याने आतापर्यंत शेकडो वन्यजीव मारले असल्याचे तेथील स्थानिक नागरिक सांगतात. बरं फक्त वन्यजीव मारून तो शांत बसला नाही तर त्याने अनेक माणसांनाही आतापर्यंत मारहाण केली आहे. पण सुरेश धस यांचा १०० टक्के आशीर्वाद असल्याने पोलीस त्याला हात लावत नाही.

भलेही एक दोन गुन्हे मीच त्याच्यावर दाखल करायला सांगितले, असे सुरेश धस सांगत असले तरी खोक्याच्या वाढदिवशी त्या न विसरता दिलेल्या शुभेच्छा आणि समाजमाध्यमांवर फिरलेली ध्वनीफित यामुळे पोलिसही खोक्याला दचकून असतात. अशी खोक्याची गुन्हेगारी पार्श्वभूमी आहे.