महाराष्ट्रातील अ वर्ग प्राप्त असलेलं पहिलं प्रति पंढरपूर जिथं भरतो वैष्णवांचा मेळा, हे आहे लोकेशन

सातारा : महाराष्ट्राचे आराध्य दैवत असलेले विठ्ठलाच्या वास्तव्याचे स्थान म्हणजे पंढरपूर होय. प्रत्येकाला वर्षातून एकदा तरी पंढरपूरला जावे असे वाटते. विठ्ठलाचे दर्शन घ्यावे ही मनोभावे इच्छा असते. याच इच्छेने पंढरपूर या चंद्रभागेच्या काठावर असलेल्या या तीर्थक्षेत्राच्या ठिकाणी दर्शनासाठी दरदिवशी लाखो भाविक येतात. मात्र, काही लोकांना इच्छा असूनही आषाढी एकादशीला पंढरपूरला जाता येत नाही.

म्हणून लोकं साताऱ्याजवळील जावली तालुक्यात असलेल्या करहर या ठिकाणी विठु माऊलीच्या दर्शनासाठी जातात. या ठिकाणी असलेल्या विठ्ठल-रुख्मिणीच्या मंदिराला प्रति पंढरपूर असे म्हणतात. साताऱ्यातील करहर गावात असलेले हे विठ्ठल-रुख्मिणीचे मंदिर महाराष्ट्रातील पहिलं अ दर्जा प्राप्त असलेले प्रति पंढरपूर आहे.

सातारा जिल्ह्यातील जावली तालुक्यात असलेलं करहर गाव साताऱ्यापासून 35 ते 38 किलोमीटर अंतरावर वसलेले आहे. या मंदिरात जे वारकरी, भक्तगण, लहान मुले, त्याचबरोबर वृद्ध पंढरपूरला जाऊ शकत नाहीत, ते सर्वजण या प्रति पंढरपूर येथे येतात. आषाढी एकादशीला याठिकाणी भाविकांची प्रचंड मोठ्या प्रमाणात गर्दी पाहायला मिळते.