नवऱ्यासाठी वडाची पूजा करायला गेल्या महिला फेऱ्या मात्र अर्ध्याच; समोर उभं राहिलं संकट

पोलादपूर तालुक्यात सर्वत्र सवाष्णींचा वटसावित्रीपूजनाचा सण आनंदात आणि उत्साहामध्ये सुरू असताना अचानक घडलेल्या या घटनेमुळे तब्बल 11 महिला आणि 1 पुरूष असे 12 जणांना पोलादपूर ग्रामीण रूग्णालयामध्ये दाखल केलं गेलं, या बातमीने ग्रामीण भागातील सर्वच जण प्रचंड हवालदिल झाले.

निवे गावातील वटवृक्षाखाली पाच- सहा महिलांची पूजा झाल्यानंतर आणखी चार पाच जणी वटवृक्षाखाली पुजेसाठी जमल्या. यामुळे सर्वांच्या पुजेनंतर नारळ फोडण्यासाठी महिलांनी साधारण 100 फूट अंतरावर शेतात बांधांवरील गवताची बेणणी करणाऱ्या अनंत नाना तळेकर यांना हाक मारून बोलावून घेतले. यावेळी अनंत तळेकर यांनी नारळावरील सालं काढून तो फोडण्यासाठी आपटणार तोच हजारो मधमाशांनी त्यांना वेढले आणि चावे घेण्यास सुरूवात केली.

यावेळी महिलांनादेखील मधमाशांनी डंख करण्यास सुरूवात केली. अशा अवस्थेत अनंत तळेकर यांनी जवळच्या मंदिरामध्ये सर्व महिलांना जाण्यास सांगून मंदिरात पोहोचल्यानंतर मंदिराचा दरवाजादेखील बंद करून घेतला. मात्र, तोपर्यंत महिलांना मधमाशांनी डोक्यावरील केसांमध्ये, चेहऱ्यावर तसेच हातावर आणि मानेवर दंश केल्याने सर्वांनाच वेदना असह्य होऊन त्या मंदिरामध्ये लोळू लागल्या.

काही वेळाने मधमाशा शांत झाल्या आणि निघून गेल्या त्यानंतर अनंत तळेकर आणि सर्व महिलांनी ग्रामस्थांशी संपर्क साधून पोलादपूर ग्रामीण रूग्णालयामध्ये सर्व 12 जणांना 108 आणि 102 रूग्णवाहिकेने दाखल केले. आता सर्वांच्या प्रकृती सुधार होत असल्याचे वैद्यकीय परिचारिकांनी सांगितले आहे.