Mahaparinirvan Din: ‘समतेचं सपान आता करूया साकार..’, शिवाजी पार्कवर पहिल्यांदाच रॅपमधून बाबासाहेबांना अभिवादन

मुंबई: भारतरत्न डॉ. बाबासाहेब आंबेडकर यांचा आज 6 डिसेंबरला महापरिनिर्वाण दिवस आहे. मुंबईतील चैत्यभूमीवर संपूर्ण देशभरातून लाखो भीम अनुयायी अभिवादन करण्यासाठी आले आहेत. चैत्यभूमीवर भीम अनुयायांचा मेळा जमला असून प्रत्येकजण आपआपल्या पद्धतीनं बाबासाहेबांना मानवंदना देतोय. काही तरुणांनी चक्क रॅपच्या माध्यमातून बाबासाहेबांना मानवंदान दिलीये. तसेच समतावादी चळवळीचे विचार या रॅप संगीताच्या माध्यमातून मांडले आहेत. याच तरुणांनी लोकल18 सोबत बोलताना आपल्या कलेबाबत माहिती दिलीये.

पुण्यातील ‘बोल इन्कलाबी’ हा ग्रुप आज सकाळपासूनच भीम गीत आणि रॅप यांचे एकत्रीकरण करून छत्रपती शिवाजी महाराज पार्क इथे कार्यक्रम सादर करत आहे. 7 ते 8 तरुण-तरुणींचा हा ग्रुप नव्याने काहीतरी सर्वांसमोर आणत आहेत. भीम गीत आणि रॅप असा प्रयोग आजपर्यंत कधीच कोणी केला नव्हता. आजच्या महापरिनिर्वाण दिनानिमित्त सगळे एकत्र येऊन लोकांचं मनोरंजन करत आहेत. उभे राहून केलेल्या सगळ्या रॅपना उपस्थितांचा खूप चांगलाच प्रतिसाद मिळत आहे.