Mumbai Kabutarkhana Protest : धारदार शस्त्रांनी कबुतरखान्यात धुडगूस! पोलिसांकडून 150 आंदोलकांवर गुन्हा दाखल, दोन आठवड्याने उचलले पाऊल

उच्च न्यायालयाच्या आदेशानुसार मुंबई महापालिकेने कबुतरखान्यात पक्ष्यांना खाद्य टाकण्यास बंदी घालून तो परिसर बांबू आणि ताडपत्रीने बंद केला होता. या कारवाईसाठी महापालिकेकडून पोलीस बंदोबस्तही तैनात करण्यात आला होता. मात्र, त्याविरोधात काही पक्षीप्रेमी आणि जैन समुदायातील नागरिकांनी कबुतरखाना येथे बेकायदेशीर जमाव जमवून आंदोलन सुरू केले होते.

आंदोलनादरम्यान काही महिलांनी चाकूने ताडपत्री फाडून बांबू उचकटून टाकले. परिसरात मोठ्या प्रमाणावर घोषणाबाजी आणि गोंधळ उडाल्याने परिस्थिती तणावपूर्ण बनली. आंदोलकांच्या हाती ब्लेड, चाकू होते. हे धारदार शस्त्र फक्त ताडपत्री फाडण्यासाठी होते, असे म्हटले जात होते. जैन समुदायातील नागरिकांनी केलेल्या या आक्रमक आंदोलनानंतर मुंबईसह राज्यात संताप व्यक्त केला जात होता.