PM Modi In Lex Fridman Podcast: PM मोदींचा युक्रेन-रशियाला थेट सल्ला, युद्धाचा शेवट फक्त वाटाघाटींच्या टेबलावर; भारत शांततेच्या बाजूने ठाम

पंतप्रधान मोदी यांनी असेही नमूद केले की, आधी शांततेसाठी वाटाघाटी करणे कठीण होते, मात्र सध्याची परिस्थिती योग्य संधी देत आहे. युक्रेन आणि रशियाने एकत्र बसून चर्चा केली तरच युद्ध संपुष्टात येईल. युक्रेन आपल्या मित्रदेशांसोबत कितीही चर्चा करत असला तरी त्याचा काहीही उपयोग होणार नाही. युद्धाचा शेवट करण्यासाठी दोन्ही पक्षांचा सहभाग महत्त्वाचा आहे, असे मोदी म्हणाले.

युद्धावर भारताची भूमिका स्पष्ट करताना मोदी म्हणाले, या युद्धात अनेकांचे हाल झाले आहेत. जागतिक दक्षिण देशांनाही याचा मोठा फटका बसला आहे. संपूर्ण जग अन्न, इंधन आणि खत संकटाने त्रस्त आहे. त्यामुळे आंतरराष्ट्रीय समुदायाने एकत्र येऊन शांततेसाठी प्रयत्न करावेत. मी कोणत्याही बाजूने नाही, पण माझी भूमिका शांततेच्या बाजूने आहे. माझी भूमिका तटस्थ नाही, तर शांततेसाठी ठाम आहे.

अमेरिकी राष्ट्राध्यक्ष डोनाल्ड ट्रम्प यांच्यासोबत २८ फेब्रुवारीला झालेल्या वादानंतर युक्रेनचे राष्ट्राध्यक्ष वोलोडिमिर झेलेन्स्की युरोपकडून पाठिंबा मिळवण्याचा प्रयत्न करत आहेत. झेलेन्स्की यांनी लंडनमध्ये युकेचे पंतप्रधान कीअर स्टार्मर आणि अन्य युरोपीय नेत्यांची भेट घेतली. या बैठकीत युक्रेनला मदत करण्याच्या धोरणांवर चर्चा करण्यात आली आणि तयार करण्यात आलेला शांतता प्रस्ताव अमेरिकेसोबत शेअर करण्याचा निर्णय घेण्यात आला. अशा परिस्थितीत रशियासोबत शांतता वाटाघाटी करण्यासाठी बसण्याची पंतप्रधान मोदींची सूचना महत्त्वाची ठरते.