कांदिवलीतील नामांकीत सोसायटीतील लाजीरवाणा प्रकार, पोलिसांकडून FIR दाखल

विनोद वर्मा यांनी सोसायटीच्या व्हॉट्सॲप ग्रुप आणि ४०० सदस्यांना पाठवलेल्या ई-मेलवर एका महिला सदस्याच्या पतीबाबत आक्षेपार्ह आणि अश्लील भाषेचा वापर करून संबंधित महिलेचे चारित्र्यहनन केले. यापूर्वी अनेकदा वर्मा हे या महिला सदस्याचा पाठलाग करत होते आणि अश्लील हावभाव करत होते, मात्र बदनामीच्या भीतीने महिलेने तक्रार केली नव्हती.

सोसायटीतील सदस्यांच्या म्हणण्यानुसार, विनोद वर्मा गेल्या तीन वर्षांपासून सचिव आहेत आणि ते कांदिवलीतील भाजपच्या एका कार्यकर्त्याशी संबंध ठेवून आपला प्रभाव दाखवत होते. या राजकीय कनेक्शनचा वापर करून ते सोसायटीत मनमानी कारभार चालवत होते. वर्मा यांच्यावर यापूर्वी २०२३ मध्येही याच सोसायटीतील एका महिलेच्या विनयभंगाचा एफआयआर दाखल आहे. त्यांनी यापूर्वी एका महिलेचा व्हिडीओ बनवून तिची बदनामी केल्याचेही समोर आले आहे.

या गंभीर घटनेनंतर सोसायटीतील सदस्यांनी गृहमंत्री देवेंद्र फडणवीस यांना पत्र लिहिण्याचा निर्णय घेतला आहे. जर राजकीय पक्षाच्या नावाचा वापर करून महिला असुरक्षित असतील, तर आरोपी विनोद वर्मा यांना तातडीने अटक करून त्यांच्यावर कठोर कारवाई करण्याची मागणी सदस्यांनी केली आहे.