कोणता आंबा आहे सगळ्यात महागडा? हापूस विसरा 'या' आंब्याची किंमत तर लाखोंच्या घरात

सध्या बाजारात देखील आंबे विकायला आले आहेत. अनेक लोक पेट्याच्या पेट्या आपल्या घरी घेऊन जात आहेत. ज्यामध्ये हापूस, रत्नागीरी, देवगड आंब्यांचा समावेश आहे.

नावाप्रमाणेच अंब्यांची वेगवेगळी चव, आकार आणि रंग असतो. एवढंच नाही तर त्याच्या किंमतीही वेगळ्या असतात.

पण तुम्ही कधी जांभळ्या रंगाचा आंबा खाल्लाय का? आता तुम्हाला प्रश्न पडेल की जांभळ्या रंगाचा पण आंबा असतो का? तर हो.

जांभळ्या रंगाचा आंबा हा जपानमध्ये पिकवला जातो. या आंब्याची किंमत एवढी आहे की याच्या एक किलो दरात तुम्ही अनेक किलो हापूस विकत घेऊ शकता.

जपानमध्ये मिळणाऱ्या या आंब्याचे नाव मियाझाकी आहे. नावापेक्षाही या आंब्याची किंमत विशेष आहे.

हा आंबा 2.75 लाख रुपये प्रतिकिलो दराने विकला जातो. या आंब्याच्या वैशिष्ट्याबद्दल सांगायचे तर, एका आंबाचं वजन सुमारे 350 ग्रॅम आहे आणि त्यात 15 टक्क्यांहून अधिक साखर आहे.

हा आंबा अतिशय खास पद्धतीने तयार केला जातो. झाडाला फळे लागल्यानंतर प्रत्येक फळ जाळीच्या कापडाने बांधले जाते. त्यामुळे त्याचा रंग बदलतो.

मियाझाकी आंबा पिकवण्याची पद्धत सोपी नाही. हा आंबा पिकवताना विशेष काळजी घ्यावी लागते. तसेच हा आंबा फार कमी प्रमाणात तयार होतो, त्यामुळे त्याची मागणी खूप जास्त राहते.

तज्ज्ञांच्या मते, मियाझाकी आंब्यामध्ये व्हिटॅमिन ए खूप चांगल्या प्रमाणात आढळते, जे डोळ्यांच्या आरोग्यासाठी खूप चांगले आहे. याशिवाय, हे व्हिटॅमिन सीचा एक चांगला स्रोत आहे, जे रोगप्रतिकारक शक्ती मजबूत करण्यास मदत करते. त्याच वेळी, या आंब्यामध्ये पोटॅशियम देखील असते, जे रक्तदाब नियंत्रित करण्यास खूप मदत करते.