Pune News : पुणेकरांची वाहतूक कोंडीतून सुटका होणार, सरकारने तयार केला प्लॅन

हा मार्ग किती उपयुक्त ठरेल आणि रस्त्यावर वाहतूक कितपत कमी होईल, हे जाणून घेण्यासाठी शास्त्रीय अभ्यास केला जाणार आहे. पीएमआरडीएने मोनार्क नावाची एजन्सी निवडली आहे, जी पुढील दीड महिन्यात अहवाल सादर करेल. त्या अहवालाच्या आधारेच प्रकल्प राबवायचा की नाही, याचा अंतिम निर्णय होईल.

पुणे शहरात दररोज मोठ्या संख्येने नागरिक बाहेरील भागातून येतात आणि कामधंद्यासाठी शहराच्या एका टोकापासून दुसऱ्या टोकापर्यंत प्रवास करतात. या नागरिकांच्या प्रवासाला सुलभ करण्यासाठी रिंग रोड, महामार्ग जोडणीसारखे अनेक प्रकल्प हाती घेण्यात आले आहेत. यामध्ये येरवडा ते कात्रज भुयारी मार्ग हा एक महत्त्वाचा प्रकल्प मानला जात आहे. पीएमआरडीएचे आयुक्त योगेश मासे यांनी या प्रकल्पाचे नेतृत्व घेतले आहे आणि मुख्यमंत्री देवेंद्र फडणवीस यांनी त्यास मान्यता दिली आहे.