Pune News: पोरांनी नायलॉन मांजा वापरल्यास पालकांची खैर नाही; संक्रांतीआधी पुणे पोलिसांचा कठोर पवित्रा

पुणे: मकर संक्रांतीचा सण अद्याप महिनाभर लांब असली तरी पुण्याच्या आकाशात आत्तापासूनच पतंग दिसू लागले आहेत. मात्र, या आनंदाच्या सणाला नायलॉन आणि चायनीज मांजाच्या रूपाने जीवघेणी धार लागली असून, शहरभर या प्रतिबंधित मांजाची विक्री छुप्या पद्धतीने सुरू असल्याचे चित्र आहे. हा मांजा दुचाकीस्वार, पादचारी आणि मुक्या पक्ष्यांच्या जिवावर बेतत असल्याने पुणे पोलिसांनी आता अत्यंत कठोर पवित्रा घेतला आहे. केवळ मांजा विकणाऱ्यांवरच नव्हे, तर तो वापरणाऱ्यांवर आणि विशेषतः नायलॉन मांजा वापरून पतंग उडवणाऱ्या अल्पवयीन मुलांच्या पालकांवरही गुन्हे दाखल करण्याचा सज्जड इशारा पोलिसांनी दिला आहे.