Shirur Loksabha : शिरूरमध्ये नेता की अभिनेता? मतदारांचा कौल कुणाला? घसरलेली टक्केवारी कुणाचं वाढवणार टेंशन

शिरूर लोकसभेचा घाट ते दिल्ली ही शर्यंत कोण जिंकणार?

अमोल कोल्हे सलग दुसऱ्यांदा खासदार होणार की शिवाजी आढळराव खासदारकीचा चौकार मारणार? यावरून तर्क-वितर्क लढवले जातायेत. अशातच गेल्या लोकसभेतील आणि यंदाच्या लोकसभेतील झालेली मतदानाच्या टक्केवारीवरून ही वेगवेगळे अंदाज बांधले जातायेत.

जुन्नर 58.16% 64.65%

आंबेगाव 62.95% 70.13%

खेड-आळंदी 57.76% 62.20%

शिरूर 56.91% 61.45%

हडपसर 49.41% 57.45%

भोसरी 47.71% 47.84%

राज्यातील राजकारणाची घसरलेली पातळी. नेत्यांनी सोडलेली तत्व, निष्ठा आणि स्वाभिमान पाहून मतदारांचा राजकारण्यांवरील उडालेला विश्वास, सोबतचं शिरूर लोकसभेतील उन्हाचा तडाखा आणि अवकाळी पावसाचा व्यत्यय, यामुळं मतदानाची टक्केवारी घसरली. शिरुर लोकसभा मतदार संघात 2019 ला 60.62 टक्के मतदान झाल होत. ते 2024 ला 54.16 पर्यंत खाली आलं. म्हणजे थेट 6 टक्क्यांनी मतांची घसरण झाली. आता या ना त्या कारणाने मतदानाकडे पाठ फिरवणाऱ्या मतदारांचा फटका कोणाला बसणार यावरून चर्चांना उधाण आलंय.

तर दुसरीकडे लोकसभेतील 6 विधानसभांमध्ये 2019 साली आणि यंदा मतदानाच्या टक्केवारीत चांगलाच बदल झालाय. अमोल कोल्हेंना 2019 साली जुन्नर विधानसभेतून 41 हजार 551 मतांची आघाडी मिळाली होती. पण यंदा जुन्नर विधानसभेत 6.49 टक्के मतदान कमी झालंय. आढळरावांचा बालेकिल्ला असलेल्या आंबेगावमधून 25 हजार 697 अधिकची मतं कोल्हेंना मिळाली होती. पण यंदा इथून 7.18 टक्क्यांनी मतदान घटलंय. खेड-आळंदी विधानसभेत ही 7 हजार 446 मतांचं कोल्हेंना लीड होतं. तिथं ही 4.44 टक्क्यांची घसरण आहे. तसेच शिरूर विधानसभेतून ही 26 हजार 305 मतांनी कोल्हेंची आगेकूच कायम होती. पण इथं ही यंदा 4.54 टक्के मतदारांनी मतदानाकडे पाठ फिरवली आहे. भोसरी आणि हडपसरमध्ये शिवाजी आढळरावांना 37 हजार 77 आणि 5 हजार 370 मतांची आघाडी होती. मात्र, या विधानसभांपैकी हडपसरमध्ये 8 टक्के मतांची टक्केवारी खालावली. फक्त भोसरी विधानसभेत अवघं 0.13 टक्के इतकीच मतं कमी झालीत.

2019 आणि 2024 या दोन्ही लोकसभांची टक्केवारी पाहता, खालावलेली टक्केवारी कोणाचं टेन्शन वाढवणार आणि कोणाला फायद्याची ठरणार. यावरून अनेक तज्ञ आपापली मतं नोंदवत आहेत. खरं तर इथे सुरवातीला डॉ. कोल्हे विरोधात आढळराव अशी असलेली लढत शेवटी शरद पवार विरोधात अजित पवार अशीच रंगली. अजित पवारांनी शेवटच्या 4 दिवसात डझनभर सभा तर शरद पवार यांनीही अर्धा डझन सभा घेतल्या.

मात्र, महायुतीची मतदार संघातील ताकद, सोबतचे 5 आमदार आणि त्यांनी कागदावर केलेलं बेरजेचं राजकारण सत्यात उतरलं तर मात्र शिवाजी आढळराव खासदारकीचा चौकार निश्चितपणे मारतील. त्यामुळं 25 लाख मतदारांच्या पचनी महायुतीचं की महाविकासआघाडीचं राजकारण पडलं हे चार जूनच्या निकालातूनचं स्पष्ट होईल. मात्र निकाला आधीच डॉ. कोल्हेचे मतदार संघात विजयाचे फ्लेक्स झळकू लागल्यान शिरूरला नेत्याची हवा आणि अभिनेत्याचा विजयाचा दावा असंच चित्र पाहायला मिळतंय.