जेव्हा मनोहर जोशींनी सुरू केलं झुणका-भाकर केंद्र, आठवणीत शिवसैनिक भावूक

पुणे : राज्याचे माजी मुख्यमंत्री आणि शिवसेनेचे ज्येष्ठ नेते डॉक्टर मनोहर जोशी यांचं आज (23 फेब्रुवारी) निधन झालं. वयाच्या 86व्या वर्षी त्यांनी अखेरचा श्वास घेतला. ठाकरे घराण्याच्या चार पिढ्या पाहिलेला, प्रबोधनकार ठाकरेंपासून आदित्य ठाकरेंपर्यंत शिवसेनेशी एकनिष्ठ असणारा नेता म्हणून त्यांची ओळख सर्वश्रुत आहे. त्यांच्या निधनामुळे राजकीय वर्तुळात शोककळा पसरलीये. पुण्यातील जेष्ठ शिवसैनिक रामभाऊ पारीख यांनी मनोहर जोशी यांच्या आठवणींना उजाळा दिला.

शिवसैनिक रामभाऊ पारीख यांनी सांगितलं की, 'मनोहर जोशी सर हे शिवसैनिकांना सांभाळणारे नेते होते. बाळासाहेबांनी तयार केलेल्या अष्टप्रधान मंडळात मनोहर जोशी एक अत्यंत हुशार शिवसैनिक होते. मला त्यांच्या जवळ राहण्याचा योग आला. 1994 साली मी त्यांना राजगड स्मारक समितीच्या वतीने निमंत्रण दिलं होतं. त्यानंतर ते मुक्कामाला पुण्यात आले आणि आम्ही तिथून राजगडला गेलो. तिथे आम्ही महाराजांना नवस केला की, मनोहर जोशी मुख्यमंत्री व्हावेत आणि त्यानंतर त्यांनी इथे यावं. ही घटना आम्ही जोशी सरांना सांगितली. मग 1995 साली जेव्हा मनोहर जोशी यांनी मुख्यमंत्रीपदाची शप्पथ घेतली, त्यानंतर ते थेट राजगडला आले. त्यावरूनच मला पुन्हा एकदा कळलं की, जोशी सर हे शब्द पाळणारे आणि शिवसैनिकांना महत्त्व देणारे नेते आहेत.'