जेव्हा मुख्यमंत्री झाल्यावर मनोहर जोशी स्वत: चप्पल घेऊन आले...पुण्यातल्या शिवसैनिकाने सांगितला 'तो' किस्सा

पुणे : राज्याचे माजी मुख्यमंत्री आणि शिवसेनेचे ज्येष्ठ नेते डॉक्टर मनोहर जोशी यांचं आज (23 फेब्रुवारी) निधन झालं. वयाच्या 86व्या वर्षी त्यांनी अखेरचा श्वास घेतला. ते शिवसेनेच्या स्थापनेपासून शिवसेनाप्रमुख बाळासाहेब ठाकरे यांच्या निकटवर्तीयांपैकी मानले जायचे. कट्टर शिवसैनिक अशी त्यांची कारकीर्द होती. मनोहर जोशी यांच्या जाण्याने राजकीय वर्तुळावर शोककळा पसरली आहे. पुण्यातील काही शिवसैनिकांनी त्यांच्या जुन्या आठवणींना उजाळा दिला.

हा किस्सा आहे पुण्याचे जेष्ठ शिवसैनिक दत्तू डोंगरे यांचा. त्यांचे सुपूत्र प्रवीण दत्तू डोंगरे यांनी या आठवणींना उजाळा देताना सांगितलं की, 'माझे वडील दत्तू डोंगरे यांनी शिवसेनेचा मुख्यमंत्री जोपर्यंत होत नाही तोपर्यंत मी चप्पल घालणार नाही, असा पण घेतला होता. त्यावेळी बाळासाहेबांनी मुख्यमंत्री व्हावं ही सर्व शिवसैनिकांची इच्छा होती. परंतु आपण कधीच सत्तेचं कोणतंही पद घेणार नाही, अशी शप्पथच बाळासाहेबांनी घेतली होती. त्यामुळे ते जर मुख्यमंत्री नाही, तर महाराष्ट्राचा शिवसेनेचा मुख्यमंत्री कोण? हा प्रश्न सर्वांनाच पडला होता. त्यावेळी मनोहर जोशी यांचं नाव अचानकपणे जाहीर करण्यात आलं.'