घर असो की हॉटेल, महाराष्ट्रातलं असं गाव जिथे मटण-चिकन खातचं नाही!

रेणावी गावातील सगळे हिंदू लोक शाकाहारी आहेत. तर काही मुस्लिम बांधवही शाकाहारी आहेत. येथील श्री रेवणसिद्धनाथ लोकांचे श्रद्धास्थान आहे. श्रीनाथांवर लोकांची मोठी श्रद्धा असल्याने इथले लोक शाकाहारी आहेत. तसेच लोकांच्या मनामध्ये मांसाहार केला तर देव शिक्षा देतो याची देखील भीती आहे. पूर्वी तशी काही उदाहरणे घडल्याचेही गावकरी सांगतात. 79 वर्षाचे बापू शांताराम यादव-पाटील यांनी गावात घडलेल्या आणि ऐकलेल्या काही हकीकती सांगितल्या. “मांसाहार करणाऱ्या पाच-सहा लोकांना ऐकायला न येणं, डोळं जाणं, हाता-पायांना दुखापत होणं, अपघात होणं अशा घटना घडल्या आहेत. मग देवाची माफी मागून ती लोक शाकाहारी झाली," असं यादव-पाटील सांगतात.

गावामध्ये लग्न ठरवण्यासाठी शाकाहार करणारीच मुलगी बघितली जाते. पूर्वी मांसाहार करत असली तरी लग्नानंतर मांसाहार सोडावा लागतो. मुलीची परवानगी असली तरच लग्नाची सुपारी फोडली जाते. तसेच रेणावी गावातील मुलगी लग्न होऊन परगावी देताना देखील मांसाहार खाणार किंवा बनवणार नसल्याची बोलणी आधीच केली जाते. ज्या घरामध्ये रेणावीच्या मुलींना जबरदस्ती मांसाहार खाण्यास, बनविण्यास किंवा खरखटे धुण्यास लावले, त्या घरामध्ये काही ना काही विपरीत घटना घडल्याचे यादव-पाटील यांनी सांगितले. अलीकडे मांसाहार करण्याचे प्रमाण वाढल्याने या गावातील मुलांना लग्नासाठी मुली मिळत नसल्याचे देखील त्यांनी सांगितले.

खानापूरचा घाटमाथ्यावरील या गावातील बरेच लोक सोने-चांदीच्या व्यवसायानिमित्त परराज्यामध्ये राहतात. यापैकी व्यावसायिक धनाजी यादव यांच्याशी संवाद झाला. तेव्हा त्यांनी 'मध्यप्रदेश मध्ये राहत असूनही मांसाहार करत नाही. इतकच काय तर मांसाहार करणाऱ्या लोकांच्या घरातील पाणी देखील पित नसल्याचे सांगितले. प्रवासामध्ये रेल्वेतील कोणतेही पदार्थ विकत घेऊन खात नाही असे देखील त्यांनी सांगितले.

पूर्वी केव्हातरी या गावामध्ये इंग्रज कुटुंब राहायला आले होते. त्यांनी मांसाहारी अन्नपदार्थ शिजवले होते. तेव्हा गावातील लोकांनी त्यांना हकलवून लावल्याची हकीकत गावातील वृद्ध लोक आजही सांगतात. तसेच पूर्वी विहिरीतून पाणी काढण्यासाठी मोट वापरली जात होती. पूर्वी मोट जनावराच्या कातडीपासून तयार केला जात होत्या. मोट बनवण्यासाठी जनावरांची कातडी वापरली जात असल्याने येथील लोक मोटेचे पाणी पित नव्हते. अलिकडे विजेवरील पंप आल्याने पिण्याच्या पाण्याचा प्रश्न मिटल्याचेही गावकरी सांगतात.

रेणावी गावामध्ये वर्षातून दोन-तीन यात्रा भरतात. परंतु, सर्व यात्रा या शाकाहारी जेवणावळींच्या असतात. पाहुणे-रावळे आले तरी देखील इथे शाकाहारी जेवणाने पाहुणचार केला जातो. गावामध्ये आणि गावाच्या आसपासच्या 8-10 किलोमीटरवर चिकनचे दुकानही पाहायला मिळत नाही. इतकेच काय तर हॉटेल आणि नाश्त्याच्या गाड्यावरही केवळ शाकाहारी पदार्थच विक्रीसाठी ठेवले जातात.