खरंच 7 वेळा चावला साप? विकासच्या दाव्यावर डॉक्टरांचा रिपोर्ट; धक्कादायक खुलासा

विकासच्या म्हणण्यानुसार, 2 जून रोजी रात्री 9 वाजता बिछान्यातून उठत असताना त्याला पहिल्यांदा साप चावला. त्यानंतर कुटुंबीय त्याला एका खासगी नर्सिंग होममध्ये घेऊन गेले. दोन दिवस तो तिथं दाखल होता. उपचारानंतर तो बरा होऊन घरी आला. ही एक सामान्य घटना असल्याचं कुटुंबीयांना वाटलं. मात्र 10 जूनच्या रात्री पुन्हा सापाने चावा घेतला. कुटुंबीयांनी तातडीने रुग्णालयात नेलं. यावेळीही तो उपचारानंतर बरा झाला. मात्र, त्याला सापाची भीती वाटू लागली आणि त्याने खबरदारी घेण्यास सुरुवात केली. मात्र सात दिवसांनंतर 17 जून रोजी पुन्हा घरात सापाने दंश केला. त्यामुळे त्याची प्रकृती बिघडू लागली आणि कुटुंबीय घाबरले. मग त्याच हॉस्पिटलमध्ये उपचार घेऊन तो परत बरा झाला.

पीडित तरुणाचे काका राधाकृष्ण दुबे यांनी सांगितले की, काल सर्प दोषापासून मुक्त होण्यासाठी काही तांत्रिकांनी काही उपाय सांगितले आहेत. त्यांचा पुतण्या विकाससोबत ते चित्रकूटला गेले. रामघाटावर मंदाकिनी नदीत स्नान केल्यानंतर कामनाथ स्वामी आणि हनुमंधरा यांचं दर्शन घेतलं. नंतर मेहंदीपूरला बालाजीचं दर्शन घेतलं आणि पूजा केली. सापाच्या भीतीमुळे विकासने घरापासून 500 किमी अंतरावर असलेल्या मेहंदीपूर बालाजी मंदिरातच आसरा घेतला आहे.

ही बाब सातत्याने प्रसारमाध्यमांमध्ये आल्यानंतर आता जिल्ह्याच्या आरोग्य विभागानं या प्रकरणाची दखल घेतली आहे. या प्रकरणाचं गूढ उकलण्यासाठी फतेहपूर प्रशासनाने एक समिती स्थापन केली.

आता सीएमओ डॉ राजीव नयन गिरी यांनी संपूर्ण प्रकरणाचं सत्य उघड केलं आहे. डीएमला लिहिलेल्या पत्रात गिरी यांनी विकास स्नेक फोबियाने ग्रस्त असल्याचं सांगितलं. डॉ. राजीव नयन गिरी यांनी पत्रात म्हटलं आहे की, 'वारंवार साप चावल्याप्रकरणी 12 जुलैपासून समितीने विकास द्विवेदीची चौकशी केली. हा अहवाल 15 जुलै रोजी सादर होत आहे. एवढ्या कमी कालावधीत एखाद्या व्यक्तीला सापाने वारंवार दंश करणं शक्य होत नाही, असा निष्कर्ष तपास समितीच्या निदर्शनास आला. पहिल्यांदाच, त्याला 2 जून 2024 रोजी साप चावला असावा. राम सानेही मेमोरियल हॉस्पिटलमध्ये योग्य उपचार देण्यात आले. यानंतर तो सापाच्या फोबियाने ग्रासल्याचं दिसून येतं. त्याला आपल्याला पुन्हा पुन्हा साप चावल्यासारखं वाटतं. अशा परिस्थितीत त्याने मानसोपचार तज्ज्ञांचा सल्ला घेणं योग्य ठरेल.