पत्नीला चावला साप, पतीनं सापाला बादलीत टाकत रुग्णालयात घेतली धाव, नेमकं काय घडलं?

भागलपुरच्या सबौर परिसरातील झुरखुरिया गावातील 29 वर्षीय महिला निशा ही आपल्या घराची साफसफाई करत होती. त्याचवेळी तिला काहीतरी चावले, असा अंदाज आला. मात्र, पाहिल्यावर सापच होता. साप पाहिल्यावर निशाने आपल्या कुटुंबीयांना आवाज दिला. तसेच मला सापाने चावा घेतला आहे, असे सांगितले.

साप त्यावेळी खोलीतच होता. निशाचा पती राहुल याने जेव्हा खोलीतील देवाचा फोटो बाजूला केला तर साप त्याच्या मागे लपलेला होता. राहुलने सापाला एका काठीने उचलून बादलीत टाकले. निशा ही बेशुद्ध होत होती. त्यावेळी घाबरलेल्या अवस्थेत असलेल्या राहुलने निशाला आपल्या दुचाकीवर बसवले आणि एका बादलीत तो साप टाकून दुचाकीच्या हँडलमध्ये ती बादली अडकवली आणि थेट पत्नीला घेऊन जवाहर लाल नेहरू मेडिकल कॉलेज रुग्णालय येथे आला.

त्याने डॉक्टरला सांगितले की, याच सापाने माझ्या पत्नीला दंश केला आहे. यानंतर डॉक्टरने निशाला उपचारासाठी आपत्कालीन विभागात पाठवले. यावेळी सापाला पाहून एकच गोंधळ उडाला होता. डॉक्टरने सांगितले की, हा संकरा जातीचा साप आहे. सापाचे विष आणि त्याच्या प्रजातीचे परीक्षण करून डॉक्टरांनी निशावर उपचार सुरू केले. तोपर्यंत तो तरुण दवाखान्यात त्या सापाला बादलीत घेऊन बसून राहिला. दरम्यान, निशाची प्रकृती सध्या धोक्याबाहेर असल्याचे डॉक्टरांनी सांगितले. मात्र, अजूनही साप रुग्णालयातच ठेवण्यात आला आहे.