शेतीतून भरघोस नफा कसा मिळवायचा? पीएम मोदींनी शेतकऱ्यांना दिला कानमंत्र

भारतीय कृषी संशोधन संस्थेच्या कार्यक्रमात पंतप्रधान मोदी शेतकऱ्यांशी संवाद साधत होते. या वेळी त्यांनी ३५,४४० कोटींच्या दोन मोठ्या योजना सुरू केल्या. यात ‘पीएम धनधान्य कृषी योजना’साठी २४,००० कोटी आणि ‘मिशन फॉर आत्मनिर्भरता इन पल्सेस’ या योजनेसाठी ११,४४० कोटींची तरतूद करण्यात आली आहे.

मोदी म्हणाले, “शेतकऱ्यांनी सेंद्रिय किंवा नैसर्गिक शेती एकदम सुरू करू नये. आधी थोड्या जमिनीवर प्रयोग करा आणि बाकी पारंपरिक शेती सुरू ठेवा. यामुळे अनुभव आणि आत्मविश्वास वाढेल.” त्यांनी पुढे सांगितले की, भारतीय शेतीत नव्या कल्पना, तंत्रज्ञान आणि सामूहिक प्रयत्नांची गरज आहे. समूह शेती आणि उच्च मूल्य पिके यामुळे ग्रामीण भारत समृद्ध होईल.

एका शेतकऱ्याने सांगितले की, पूर्वी तो हॉटेलमध्ये काम करत होता, परंतु सरकारच्या मदतीने आता त्याच्याकडे २५० गीर गायींची गोशाळा आहे. पशुसंवर्धन मंत्रालयाने ५०% अनुदान दिल्याने त्याचा मोठा फायदा झाला. दुसऱ्या शेतकऱ्याने मत्स्यपालन क्षेत्रातील प्रगतीविषयी सांगितले. सरकारच्या सहाय्याने त्याने ३०० एकरवर शेती आणि मत्स्यपालन सुरू करून २०० लोकांना रोजगार दिला आहे.

एका मोठ्या शेतकऱ्याने १,२०० एकरवर “रेझिड्यू-फ्री काबुली चणा” शेती केली असून, गटशेतीमुळे बाजारभाव चांगला मिळतो आणि नफा वाढतो, असे सांगितले.