Vat savitri vrat 2025: ज्येष्ठ महिन्याची सुरुवात! वट पौर्णिमा नेमकी कधी? दुपारनंतरची पूजा दीर्घायुष्य देईल

वट पौर्णिमेला स्त्रिया वडाची पूजा करतात. जन्मोजन्मी मला हाच पती मिळावा, त्याला दीर्घायुष्य लाभावे, असा हेतू त्यामागे असतो. या दिवशी सावित्रीने सत्यवानाचे प्राण यमाकडून परत आणल्याची, कथा पुराणात सांगितली जाते. यामुळे या दिवशी वडाची पूजा केली जाते. वडाला हिंदू धर्मात वटवृक्ष म्हणून ओळखे जाते, वडाला पवित्र वृक्ष म्हणूनही ओळखलं जातं. वडामध्ये ब्रह्मा , विष्णू आणि महेशाचा वास असल्याचे सांगितले जाते. महिला आपलं सौभाग्य आणि आंनदमय वैवाहिक जीवनासाठी वटपौर्णिमेला पूजा करतात. या दिवशी महिला एकत्र वडाची पूजा करतात. यंदा वडाची पूजा 11.35 नंतर करणं शुभफळदायी असेल.

सत्यवान सावित्रीची कथा - सावित्रीच्या तपश्चर्येमुळे तिने यमराजाला प्रसन्न करून घेतले. सावित्री बुद्धिमान होती चतुर होती. तिने ‘सासूसास-यांना पुन्हा दृष्टी लाभावी ‘यासाठी पहिला वर मागितला. ‘सास-यांचे गेलेले राज्य पुन्हा मिळावे ‘ असा दुसरा वर मागितला.  आपल्याला पुत्र व्हावा, असा तिसरा वर मागितला. प्रत्येकवेळी यमराज तथास्तु म्हणाले. नंतर यमराजाना आपली चूक कळून आली. सावित्रीच्या तपश्चर्येचे तेज , तिची पतिनिष्ठा व प्रेम पाहून यमराजही चकित झाले. त्यांचा नाईलाज झाला. त्यांनी सत्यवानाचे प्राण पुन्हा त्याच्या शरीरात घातले. सत्यवान जिवंत झाला. सासूसास-यांना पुन्हा दृष्टी आली. त्यांचे राज्यही त्यांना परत मिळाले. सावित्रीला आनंद झाला. सावित्रीने स्वत:च्या तपश्चर्येने -सामर्थ्याने सर्व गोष्टी मिळविल्या होत्या.